Li Zozanên Hesendînê niha jî ji bo avakirina baregeha leşkerî rê tê çêkirin û ji bo vê leşkeriyê xweza tê talankirin.
Li zozanên Hesendînê ku li navçeya Pasûra Amedê ye geh di bin gefa madene de ye geh jî di bin gefa leşkeriyê de ye. Piştî biryar hat girtin ku xebata madenê li Hesendînê bê destpêkirin, vê carê jî ji bo baregeha leşkerî rê tê çêkirin û xweza li vir tê talankirin. Dest bi rêya ji bo avakirina baregeha leşkerî hat kirin. Rêxistina DEM Partiyê ya Pasûrê, Hevşaredarê Pasûrê Mûrad Îpek, Komîsyona Bajêr û Hawirdorê ya Baroya Amedê, Komîsyona Ekolijiyê ya Şaxa Komeleya Hiqûqnasên Ji Bo Azadiyê ya Amedê û Komelaya Ekolojiyê wek şandeyek çûn cihê ku rêya leşkerî lê tê çêkirin. Hat dîtin ku seranserî rêya tê çêkirin dar ji kokê ve hatine rakirin û ewlehiya şirketa ku rê çêdike jî ji hêla leşker û cerdevanan ve tê girtin.
Welatiyan nerazîbûn nîşanî baregeha leşkerî dan
Leşkeran ji welatiyan re got ku ew rê ji bo baregeha leşkerî çêdikin. Şande û xelkê herêmê xwestin ku ev xebat were sekinandin û ew naxwazin xwezaya wan ji bo leşkeriyê û madenê were talankirin. Welatiyan nerazîbûn nîşanî çêkirina baregeha leşkerî da û diyar kirin ku di pêvajoyek ku çareserî tê axaftin de çima baregeha leşkerî tê çêkirin. Welatiyan ji fermandarê qereqolê xwest ku ev xebat were sekinandin heke neyê bidawîkirin d ê çalakiyên pirr berfireh pêk bînin.
Xelkê Hesendînê diyar kirin ku ew ê li dijî talana xwezaya xwe têkoşîna xwe bidomînin.
