Amed – Welatiyên li navçeya Sûrê ji ber giraniyê ji dikandaran ne razî ne û dikandar jî ji ber ku turîst tiştekî nakirin ne razî ne.
Demsalên bihar û havînê bi deh hezaran turîstên xwecihî û biyanî tên serdana Amedê. Ji ber qelebalixiyê meriv nikare piyê xwe biavêje kuçe û cadeyên Sûrê. Di vê rewşa krîza aborî de jixwe welatî nikarin tiştek bixwin û vexwin ev ne bes e dikandar jî bi bihayên zêde xwarin û vexwarinê difiroşin welatiyan. Ji ber bihabûnê welatî ji dikandaran ne razî û ji ber ku turîst jî tiştekî nakirin dikandar ji turîstan ne razî ne.
Welatiyên ji ajansa me re axivîn gilî û gazinên xwe li dijî bihabûnê anîn ziman û gotin ew nikarin li gorî dilê xwe bigerin û li cihekî rûnên vexwin û bixwin. Welatiyan diyar kir ku ji ber polîtîkayên hikûmetê yên giranî û aboriyê ew nikarin êdî tiştekî bikirin û bixwin û krîza aborî bandorek neyînî li ser wan dike.
Dikandar jî polîtîkaya aboriyê ya hikûmetê rexne dikin. Dikandaran jî anî ziman ku ew ji turîstan ne razî û dibêjin turîst pirr tên Sûrê lê bêyî tiştekî bikirin ji dikanan derdikevin û diçin û tu fêdeya wan li dikandaran nabe.
