Televîzyona Zagros 24 TV bi slogana, “Medyayek şayanî cihêrengiyan” bi zimanên Kurdî û Farisî dest bi weşanê dike. Rêveberiya kanalê ragihand ku armanca wan ragihandina geşedanên li Îran û Rojhilatê Kurdistanê ye.
Kanaleke bi navê Zagros 24 TV (Z24), bi slogana, “Medyayeke yaşanî cihêrengiyan” li ser satalaytê dest bi weşanê dike. Rêveberiya Z24ê bi daxuyaniyekê raya giştî agahdar kir ku amadekariyên wan ên teknîkî û edîtoryal bi dawî bûne û kanala wan di demeke nêz de dest bi weşanê dike. Z24, bi armanca vegirtina nûçe û geşedanên li Îran û Rojhilatê Kurdistanê, bi perspektîfeke pêşverû derdikeve pêşberî bîneran.
Dê bi du zimanan weşanê bike
Rêveberiya kanalê di daxuyaniya xwe de destnîşan kir ku weşana wan dê bi Kurdî û Farisî be. Di daxuyaniyê de hate destnîşan kirin ku Z24 dê hewil bide di navbera civakên cuda de bibe pirek û platformeke hemû reng û dengên cuda dihewîne. Her wiha di daxuyaniyê de hate destnîşan kirin ku kanal dê li ser esasê azadiya agahdarkirinê geşedanan ji gel re rabigihîne.
‘Dê bibe dengê gel’
Rêveberiyê da zanîn ku Zagros 24 TV wê bi taybetî giraniyê bide dengê jinan û wan komên civakî yên ku di medyayê de kêm tên temsîlkirin. Di daxuyaniyê de hate daxuyandin ku kanal wê hewl bide bibe “dengê gel” û pirsgirêkên rojane yên civakê bi profesyonelî bîne ser ekranê.
‘Ji gel û bo gel’
Di dawiya daxuyaniyê de hate destnîşan kirin ku Z24 dê girêdayî pîvanên rojnamevaniya gerdûnî û serbixwebûna edîtoryal e. Rêveberiyê diyar kir ku ew xwe wekî medyayeke “ji gel û bo gel” dibînin û wê nûçevaniyeke rast, bi berpirsiyarî û dûrî polîtîkayên alîgir pêşkêş bikin. Tê payîn ku bi destpêkirina weşana Z24ê re, di qada medyaya herêmê de dengekî nû û piralî zêde bibe.
