Înîsiyatîfên li Sûriyeyê ji bo azadiya Rêber Abdullah Ocalan di 20ê tebaxê de dest bi kampanya îmzeyan kirin. Heta niha 370 kesayetên navdar xwestin bi Rêberê Gelê Kurd Abdullah Ocalan re hevdîtinê bikin.
Înîsiyatîfa Azadiya Rêber Abdullah Ocalan a Sûriyeyê û Înîsiyatîfa Parêzeran a Sûriyeyê ya ji bo Parastina Rêber Abdullah Ocalan di 20ê Tebaxê de bi daxuyaniyekê diyar kirin ku ew ê di çarçoveya kampanyaya “I Want to Visit Ocalan / `Ez dixwazim bi Ocalan re hevdîtinê bikim`” de li ser asta Sûriyeyê ji siyasetmedar, akademîsyen û pêşengên civakê îmzeyan kom bikin. Berdevkê Înîsiyatîfa Azadiya Rêber Abdullah Ocalan Ferzende Munzur agahî bi Ajansa Nûçeyan a Hawarê (ANHA) re parve kir û diyar kir ku komîteyên hatine avakirin, serdana sazî, dezgeh û kesayetan dikin û xwe digihînin rewşenbîr, akademîsyen, siyasetmedar serok eşîr û kesayetên din. Ferzende Munzur da zanîn ku di 3 rojan de (21-24ê Tebaxê) li Herêma Bakur û Rojhilatê Sûriyeyê û herêmên din ên Sûriyeyê (Laziqiyê, Tertûs, Siwêda, Humis, Heleb û Şam) ji pêşengên civakê, siyasetmedar, hiqûqnas, akademisyen, bijîşk, rewşenbîr, serokên eşîr û êlan, çalakvan û oldaran 370 îmze hatin komkirin.
Kampanya 20ê Tebaxê de dest pê kir û dê di 1ê Îlonê de têkildarî kampanyayê û îmzeyên hatine komkirin daxuyanî bê dayîn. Kampanya dê li gorî pêdiviyan berdewam bike.
Îmzeyên ku bêne komkirin, dê pêşkêşî Sekreterê Neteweyên Yekbûyî (NY), Yekîtiya Ewropayê, Konseya Mafê Mirovan a NYê, Rêxistina Pêşîgirtina Îşkenceyê ya Ewropayê (CPT) û Wezareta Edaletê ya Tirkiyeyê werin kirin.
