Çarçewaya peymana ke mabênê hukmatê demkî yê Şam û Hêzanê Sûrîyeya Demokratîke de ameye kerdene, prosesê bedilnayîşê girewteyan dest pêkerd û 29 şervanê resayê herêma Cizîre.
Caardişê Peymana 29ê çeleyî ke mabênê Hêzanê Sûrîyeya Demokratîke (HSD) û hukmatê demkî yê Şamî de ameye îmzakerdene, dewam keno. Rayedarê her di hetan eşkera kerdbi ke seba rayraberdişê prosesê bedilnayîşê girewteyan, do komîteyê taybetî bêrê awankerdene. Nê komîteyî dîyarkerdişê nameyanê girewteyan, rêxistinkerdişê prosesî û koordînasyonê averşîyayîşan ser o do qad de kar bikerê.
Şervanî resayê herêma Cizîre
Goreyê agahîyanê ke çimeyanê herême ra ameyê girewtene, encamê xebata hembeşe de, bedilnayîşê girewteyan reya ewile ame kerdene. 29 şervanê HSD’yî ke hepisxaneyanê hukmatê demkî de mendêne, ameyê veradayene. Şervanê ke ameyê veradayene, herêma Cizîre de hetê Fermandarê Hêzanê Ewlekarîya Zereyî yê Herêma Cizîre Sîyabend Efrînî ra ameyê pêşwazîkerdene.
Seba heme girewteyan ameyo pêkerdene
Çimeyê herême dîyar kenê ke prosesê bedilnayîşê girewteyan çarçewaya dayîşûgirewtişanê mabênê Şam û rayedaranê Rojava de dest pêkerdo. Yeno vatene ke her di hetî vêşîkerdişê hûmara bedilnayîşanê bînan de zî pêkerdo. Goreyê çimeyan eke proses bi hewayêko aram dewam bikero do bedilîyayîşê bînî zî rojanê ameyox de bêrê kerdene.
