Kampanyaya Parastinê ya Şerîfe Mihemedî ragihand ku berpirsên Girtîgeha Lakan ya li bajarê Reşt hevdîtina Şerîfe Mihemedî û hin girtiyên siyasî bi malbatên wan qedexe kiriye. Hat diyarkirin ku ev biryar di nav malbatên wan û raya giştî de bûye sedema fikaran.
Kampanyaya Parastinê ya Şerîfe Mihemedî derbarê zordariyên li ser girtiyên li girtîgehên Îranê daxuyaniyek weşand. Di daxuyaniyê hate gotin ku ji destpêka şerê Îsraîl, Amerîka û Îranê heta niha şert û mercên li girtîgehên Îranê her ku diçe xirabtir dibe. Li gorî daxuyaniyê zext û gef li ser girtiyên siyasî zêdetir bûye. Kampanyayê diyar kir ku hevdîtina Şerîfe Mihemedî û hin girtiyên siyasî ya bi malbatan re hatiye qedexekirin.
Malbat bi fikar in
Di daxuyaniyê de hate destnîşankirin ku astengkirina hevdîtinan a li Girtîgeha Lakanê bûye sedema fikarên kûr li ser ewlehî û tenduristiya girtiyan. Aktîvîstên kampanyayê bang li raya giştî ya navneteweyî kir ku li hemberî vê mijarê bi hîstiyar bin û xwest ku girtiyên siyasî demildest serbest bên berdan.
Şerîfe Mihemedî kî ye?
Di 5ê Kanûna 2023an de Şerîfe Mihemedî li mala xwe ya li bajarê Reşt ji aliyê hêzên girêdayî Wezareta Îtlaetê ve bêy fermana dadwer hate binçavkirin. Piştî girtinê, ew şandin girtîgeha bajarê Sine ya li Rojhilatê Kurdistanê. Li wir ew di hucreya takekesî de hate girtin û li gorî agahiyên belavbûyî di dema lêpirsînê de êşkenceya fîzîkî û derûnî lê hatiye kirin. Her wiha, ji bo demeke dirêj rê nehat dayîn ku ew bi malbat û parêzerên xwe re hevdîtinê bike.
30 sal ceza lê hate birîn
Piştre Şerîfe Mihemedî ji girtîgeha Sineyê bo girtîgeha Lakan ya li bajarê Reşt hate veguhestin. Doza Şerîfe Mihemedî ji aliyê şaxa yekem ya Dadgeha Şoreşê ya Reştê ve bi serokatiya Dadwer Mihemed Elî Derwêş Goftar ve hate meşandin. Di 4ê Tîrmeha 2024an de bi hinceta “derketina li dijî desthilatê” cezayê darvekirinê lê hate birîn. Piştî vê biryarê, di 16ê Tebaxa 2025an de jî şaxa 39an a Dadgeha Bilind ya Îranê ceza hate erêkirin. Lê li gorî agahiyên herî dawî yên ku ji aliyê parêzerê wê ve hatine ragihandin, Dadgeha Bilind paşê cezayê darvekirinê betal kir û ew ceza veguherî 30 sal cezayê girtîgehê.
