Fermandarîya Pêroyî ya YPJ’yî derheqê kombîyayîşî de ke bi Wezîrê Pawitişî yê Sûrîye Murhef Ebû Qesrayî reyde kerd, eşkerayî daye.
Kombîyayîş bi waştişê fermî yê fermandarîya pêroyî seba erjnayîşê rayîr û mekanîzmeyanê ke hêzê YPJ’yî mîyanê Wezaretê Pawitişî û awanîya artêşa Sûrîye de ca bigîrê, virazîya.
‘Çarçeweya peymana HSD’yî de ame erjnayene’
Çarçeweya caardişê peymana ke 29ê çeleyî de mabênê hukmatê Sûrîye û Hêzanê Sûrîyeya Demokratîke (HSD) de ameybî îmzakerdene, derheqê tewirê beşdarîya YPJ’yî ya artêşe de fikrî ameyî parekerdene. Heyetê YPJ’yî de endamê Fermandarîya Pêroyî Rohilat Efrîn û Sozdar Hecî, fermandarîya Tabûrê Cinîyan ê Qamişlo (Lîwaya Qamişlo) Xalîsa Ayêd û Verfeka Çapemenî ya YPJ’yî Ruken Cemal ca girewt.
‘Babetê rêxistinî û huqûqî ameyî nirxnayene’
Kombîyayîşî de babetê rêxistinî û huqûqî yê prosesê entegrasyonê yê YPJ’yî ameyî erjnayene û eynî wext de bale ameye antene rol û muhîmîya cinîyan ya artêşa newîye ya Sûrîye ser o. Wezîrê Pawitişî babeta beşdarîya YPJ’yî ya artêşe rê pozîtîf nêzdî bîyo û vato ke dîyalogê derheqê rayîrê pratîkî ke beşdarîya cinîyan awanîya leşkerîye de temîn bikero, do dewam bikerê.
‘Kombîyayîş badê temasanê mîyanteweyîyan virazîya’
Kombîyayîş badê temasanê mîyanteweyî û herêmkî ke Fermandarîya Pêroyîya YPJ’yî verê naye kerdbî virazîya û amancê nê temasan qiseykerdişê derheqê ameyoxê cinîyan ê awanîyanê asayîş û leşkerî yê Sûrîye de bi. Peynîya kombîyayîşî de bi wesîleyê serrgêra ronayîşê YPJ’yî sey waştişêko merdimane vengdayîşê azadbîyayîşê embazanê girewteyan ame kerdene.
