Înîsîyatîfê Nûnî bi eşkerayîyêk rojbîyayîşê Rayberê Şarê Kurdî Abdullah Ocalanî pîroz kerd û vat ke azadîya fîzîkî ya Rayberê Şarê Kurdî Abdullah Ocalanî, yena manayê hewanayîşê kerrayêka girane ya sîneyê mîlyonan ser o û kîlîtê azadîya cinî û şaran.
Înîsîyatîfê Nûnî ê seba Azadîya Abdullah Ocalanî, bi munasebetê 4ê Nîsane rojbîyayîşê Rayberê Şarê Kurdî Abdullah Ocalanî nuşteyêk pare kerd. Înîsîyatîfî dîyar kerd ke 4ê Nîsane fecirê zîhnîyetêko new yo û dîyar kerd ke azadîya fîzîkî ya Abdullah Ocalanî sembolê azadîya mîlyonan o.
‘Ronesansê cinîyan û felsefeyê cuye’
Eşkerayî de ame vatene ke 4ê Nîsane rayîrşîyayîşê azadîye yê şaran de yew nuqtaya vurnayîşî ya. Ame dîyarkerdiş ke Abdullah Ocalan bi felsefeyê “Jin, Jîyan, Azadî” sîstemê pederşahî lerznayo û seba cinîyan û şaranê bindestan bîyo modelê ronesansî. Înîsîyatîfî vat ke Ocalan tena rayberêko sîyasî nîyo, o nasname û raştîya gandar ya şarê kurdî yo.
‘Azadîya fîzîkî waştişêko neteweyî yo’
Înîsîyatîfî dîyar kerd ke hepisxaneyê Îmralîyî bi fîkranê ayberê Şarê Kurdî Abdullah Ocalanî açarîyayo platformê roşnayî. Eşkerayî de ame vatene ke azadîya fîzîkî ya Rayberê Şarê Kurdî Abdullah Ocalanî tena waştişêko huqûqî nîyo, garantîkerdişê aştî û bi hewayêko qanûnî naskerdişê şarê kurdî yo. Reyna wina ame vatene: “Azadîya ey, yena manayê hewanayîşê kerrayêka girane ya sîneyê mîlyonan ser o.”
Vengdayîşê seferberîye
Înîsîyatîfê Nûnî vengda sazgehanê mîyanneteweyî, akademîsyen û demokratan ke seba azadîya Abdullah Ocalanî bibê seferber. Her wina vengda dewleta Tirkîya ke berpirsîyarîya xo ya tarîxî bîyara ca, qanûnanê entegrasyonê demokratîkî veja û astenganê vernîya “heqê hêvî” de hewana.
