Serekê TBMM’yî Numan Kurtulmuşî munaqeşeyanê vetişê qanûnan ser o qisey kerd û dîyar kerd ke mesulîyetê vetişê qanûnan karê partîyanê siyasî yo.
Serekê Meclîsê Mîletî yo Gird ê Tirkîya (TBMM) Numan Kurtulmuş, derheqê munaqeşeyanê proses û vetişê qanûnan ser o qisey kerd. Kurtulmuşî dîyar kerd ke ganî nê babetan de lez bêro kerdene labelê eynî wextî de ganî xebatî bi plansazî bêrê rayraberdene.
Mesulîyet yê partiyan o
Kurtulmuşî bal ant rolê partîyanê siyasîyan ser o ke grubê înan Meclîs de est ê û wina vat: “Seba ke prosesî ser o gamî bêrê eştene, mesulîyet yê partîyanê sîyasîyan o ke TBMM de est ê. Ganî seba serastkerdişanê qanûnan pêşnîyazî biresê Heyetê Gird ê TBMM’yî. Ma do rolê xo yê asankerdişî bikerê, labelê mesulîyeto sereke yê partîyan o.”
Ganî heme hetî bidîqet têbigêrê
Serekê TBMM’yî dewamê qiseykerdişê xo de îfade kerd ke waştişê înan o tewr sereke ronayîşê çekan o. Kurtulmuşî da zanayene ke seba çareserîyêka domdare û encamgir, ganî heme hetî bi mesulîyet têbigêrê û prosesî binê banê Meclîsî de rayra berê.
