Alî Koç ke 34 serrî ra dima hepîsxane ra vejîya, bi hewayêko girseyî Amed de ame pêşwazîkerdene. Koçî pêşwazîkerdişî de vat: “Azadîya embazanê ma yê zindanan û azadîya Rayberîye wezîfeyê ma yo.”
Alî Koç o ke serra 1992yî de Amed de amebi girewtene û nêzdîyê 34 serran hepisxaneyanê cîya-cîyayan de mendbi, Hepisxaneyê Karabukî yê Tîpê T’yî ra vejîya. Veradayîşê ey hetê Heyetê Îdare û Çimdarîya Hepisxaneyî ra çar reyî amebi taloqkerdene. Koç, qezaya Amedî Rezan de, vernîya Petroê Geterlerî de bi coşêko pîl ame pêşwazîkerdene.
Pêşwazîkerdişî de îdarekaranê TUHAY-DER’î yê Amedî, temsîlkarê dezgehanê sivîlan û merdimê ey amade bîyî. Alî Koç bi sloganê “Bijî berxwedana zindanan” û bi tilîliyan ame silamkerdene.
‘Wexto ke embazê mi vejîyayê, ez do xo azad hîs bikerî’
Alî Koçî qiseykerdişê xo de bal ant embazanê ke hema zindan de yê ser o û vat: “Zaf wext ez zindan de menda. Zindan de hema zî embazê ma est ê, zerrîya mi uca de ya. Heta ke embazê ma yê zindanî nêvejîyê, ez xo azad hîs nêkena. Azadîya embazanê ma û azadîya Rayberîye wezîfeyê ma yo. Ez bawer kena ke ma do bi piştîdayîşê yewbînan, înan zî azad bikerê.”
Alî Koç serra 1992yî de hetê Mehkemaya Ewlekarîya Dewlete (DGM) ra bi cezaya muebedî amebi hukmkerdene. O bi rêze hepisxaneyanê Amed, Dîlok û Karabukî de mendbi.
