Rojnameger Nedîm Orûç ke seba ke çalakîyê protestoyî yê vera hêrişanê serê Rojava amebi girewtene, badê hîrê aşman hepisxaneyê Şirnexî ra ame veradayene. Orûç badê ke ame veradayene bale ante tedayanê karê rojnamegerî, girewteyanê nêweşan û tedayê girewteyanê sîyasîyan ser o.
Muxabirê ajansê ma Nedîm Orûç, 14ê çele de taxa Nûr a Cizîr de wextê taqîbkerdişê xebere de bi pirodayîş amebi destbendkerdene. Orûço ke zêdeyê hîrê aşman hepisxane de mend, 24ê nîsane de qerarê veradayîşê ey ame dayene. Orûçî dîyar kerd ke maneyê girewtişê ey tena taqîbkerdişê xeberan ê serê Rojava bîyo û dewlete nê çalakîyê demokratîkî sey “suc” dayê mojnayene.
‘Kurdîstan parçeyêk o’
Nedîm Orûçî dîyar kerd ke sînorê fizîkî nêeşkenê vernîya hîsanê neteweyî bigîrê û vat: “Beno ke Kurdîstan bi fizîkî bibo çar lete, la rastî de her averşîyayîşêke herêmêk tesîrê xo her hîrê leteyanê bînan ser o keno. Wexto ke Vakur seba Rojava çalakî ameyêne kerdene, ma sey rojnameger nê prosesî taqîb kerdêne. La karê rojnamegerî yê ke heme dinya de meşrû yo, Tirkîya de sey suc vejenê vernîya ma.”
Hepisxaneyan de polîtîkayê taybetî
Dewamê qiseykerdişê xo de Orûçî bale ante şertanê Hepisxaneyê Şirnexî ser o û dîyar kerd ke vera girewteyanê sîyasî polîtîkayêka taybete ya pelçiknayîşî yena rayraberdene. Orûçî dîyar kerd ke wextê hûmaritişî de gardîyanî cehd kenê ke hûmaritiş payan ser o ferz bikerê û wexto ke girewteyê ney qebul nêkenê, bi zor û şîdet mudaxaleyê înan kenê. Orûçî bale ante rewşa girewteyanê nêweşan ser o û vat: “Dermankerdişê girewteyan nêyeno kerdene. Goreyê prosedurê neweyî tena 15 rojan ra reyêk seba nêweşxaneyî destûr danê. Embazêkê ma seba dejê didanê xo 10 rojî nêeşka werd biwero, bi rojan nêberd nêweşxane.”
Rojnamegerê girewte yî
Peynîyê qiseykerdişê xo de Nedîm Orûçî bale ante hûmara rojnamegeranê girewte ser o û vat ke nika zêdeyê 30 rojnamegerê kurdî hepisxaneyan de yê. Orûçî vengdayîş kerd ke heme wa hemmeslekê ey bêrê veradayene û îfade kerd ke ê do bi qerardarî qelema heqîqetî erd de nêverdê û karê xo bidomnê.
