Avûkatê heqê merdiman Ahmet Faruk Unsal dîyar kerd ke wa Abdullah Ocalan bi rêxistinê xo û temsîlkarê partîyê sîyasî rê mîyanê têkilîye de bibo û va ke bêyî ke gam bêro eştiş vengdayişê “çekronayişî” yê desthilatî nê armancêko raştin o û meseleya kurd ziwanê dayîke ra girêda ya.
Wekîlê Partîya Seyyewbînan û Demokrasî ya Şaran (DEM Partî) Sirri Sureyya Onder û Pervîn Buldan 22ê Çeleyî de Hepisxaneyê Girewte yê Ewleyîya Berze ya Tîpa F a Îmraliyî de bi Rayberê PKK’î Abdullah Ocalan rê pêvînayiş pê ardê. Dima pêvînayişê beyanat ame dayene û wina ame vatiş: “Xebatê Birêz Ocalan ê ser pêvajo domyenê. Dima ke hadreyîya der heqê na babete de bi peynî bîyê do beyanatê avzel raya pêroyî rê bêrê dayene.”
Sîyasetmedar-avûkatê heqê merdiman Ahmat Faruk Unsal ke mîyanê serrê 2013 û 2015î de pêvajoya bi nameyê “çareserîye” Komîteya Aqilmendan ca girewt, çareserîya problemê kurd û mesajê Îmraliyî şîrove kerd.
Ahmet Faruk Unsal bal ant geşedanê peynî pêvajoyê verê ciyatir ê û va ke serdemo newe de tay bedilyayişê radîkal est ê û wina va: “Nika muzakereyê Muhammed Colanî û Mazlum Ebdî bi peynî nêbîyê. Aşkera yo ke no pratîko serkewt o, do bi awayêkî bêro qebûlkerdene. Çikê ke tewro zaf Tirkîya zî ecîz bena no pratîk o.”
Wa çareserî heme kurdan bihewîno
Unsal dîyar kerd ke Abdullah Ocalan seba çareserîya kurd ê Îran, Iraq, Sûrîye û Tirkîya rê xebityeno û va: “Na xebat hîna bi komelî ra nêameya barkerdene. Ger ke serpiroyê girawe nîrê peynîkerdiş û xebatê Ocalan bi înan rê nêrê barkerdene, ez bawera kena ke do na zî sey weçînitêka avzel ser maseye de biba. Hetanî nika ti gamê zelal nêameyê eştiş la belê wa na mesele tena ser Sûrîye ra nîra gengeşekerdene. Meseleya kurd bi ziwanê dayîke ra girêda ya.”
Heqê xo yê hêvî ra wa sûd bigo
Unsal ard ziwan ke tecrîdê ser Abdullah Ocalan domyeno û na yewe zî pêvajo xira kena û va ke ger tecrîd çin bo do pêvajo hîna bi asan bimeşa û wina domna: “Gamê destpêkê yê bêrê eştiş zî çi heyfo ke hema zî nêameyê eştiş. Hetê blokê desthilatdarîye vano: ‘Wa Ocalan bivejo û heqê xo yê hêvîye ra sûd bigo, ger hewce biko wa Meclîs de qise biko’ La hetê bîn ziwan û uslubêko dişmenîye yo verba rûhê na pêvajo de bi kar aneno. Ger gamê avzel bêrê eştiş, do Abdullah Ocalan heqê xo yê hêvî ra sûd bigo.”
