Stenbol – Berdevkê Rêxistina Bajêr a DEM Partiyê ya Stenbolê Çetîn Yildiz diyar kir ku çepgir, ciwan, demokrat, jin û tevahiya beşên civakê tev li meşa “Gavek ji bo aşitiyê” bibin û got: “Demokratîkbûyîna Tirkiyeyê girêdayî xala azadiya fîzîkî ya birêz Ocalan e. Em di 16ê Gulanê de li benda gelê xwe ne û em ê bi hev re banga aşitiyê bilind bikin.”
DEM Partî dê di 16ê Gulanê de li bajarên Bakurê Kurdistan û hin bajarên Tirkiyeyê ji bo azadiya Rêberê Gelê Kurd Abdullah Ocalan bi dirûşmeya “Gavek ji bo aşitiyê” li dar dixe. Li dehan bajaran amadekariya meşê didome. Rêxistina DEM Partiyê ya Stenbolê jî ji bo meş bi girseyî pêk were, serdana partiyên siyasî, saziyên sivîl û gel dike. Berdevkê Rêxistina Bajêr a DEM Partiyê ya Stenbolê Çetîn Yildiz banga beşdariya meşê kir.
‘Em ê di meşê de daxwazên xwe bînin ziman’
Çetîn Yildiz diyar kir ku Stenbol bajareke mezin e û gelek girîng e û wiha got: “Stenbol bajarê ciwan, kedkar û jinan e, daxwaza hevpar ya avan jî aştî ye. Divê banga aştiyê herî bilind li Stenbolê bilind bibe. Di pêvajoya Aştî û Civaka Demokratîk de nîqaş li ser aştiyê tên kirin, Stenbol jî bi hemû pêkhatiyên xwe di vê pêvajoyê de xwedî fikr e. Di meşê de tevahiya pêkhateyên Stenbolê jî dê daxwazên xwe bînin ziman. Em ê banga xwe ji tevahî beşên civakê re bikin û em ê tevahî hezên ked û demokrasiye vexwînin meşê. Jixwe keda partî û saziyan ji bo demokratîkbûyîna Tirkiyeyê heye, em dixwazin vê kedê di nava yek dengî de bilind bikin.”
‘Divê em daxwazan hemû bikin yek û li kolanan bang bikin’
Çetîn Yildiz destnîşan kir ku tevahiya xebatên wan bi motîvasyona azadiya fîzîkî ya Rêberê Gelê Kurd Abdullah Ocalan tê birêvebirin û wiha axivî: “Ji 27ê Sibatê vir ve li qada siyasî mijara herî girîng azadiya fîzîkî ya birêz Abdullah Ocalan e. Xebatên me cuda cuda didomin bingeha vê jî pêş xistina pêvajoyê ye. Em her dem dibêjin demokratîkbûyîna Tirkiyeyê girêdayî azadiya fîzîkî ya birêz Ocalan e. Ev pêvajo bi înîsiyatîfa birêz Abdulalh Ocalan dest pê kir. Piştî banga birêz Abdullah Ocalan aliyê gelê Kurd li tevahî qadan de xwedî li pêvajoyê derket. Loma jî pêşketina pêvajoyê girêdayî azadiya birêz Abdullah Ocalan e. Ji bo pêvajoyê gavên ku hatine avêtin jî bi fedekariya birêz Abdullah Ocalan pêk hatin. Divê em tevahiya daxwazan bikin yek û li kolanan bang bikin.”
‘Tu hêz tune ye ku li pêşiya gelê ku rêxistinkirî bisekine’
Çetîn Yildiz di dawiya axaftina xwe de anî ziman ku ew ji bo tevahiya beşên civakê tev li meşê bibin dixebitin û got: “Em li bendê ne ku çepgir, ciwan, demokrat, sosyalîst, jin û tevahiya beşên civakê tev li meşê bibin. Daxwaza me ew e ku ji bo aştiyê gavek bê avêtin. Aliyê gelê Kurd gavên pêwist avêtin, êdî hewceye ku dewlet gav biavêje. Ji bo pêvajo bimeşê divê gav bê avêtin. Em ê jî bi vê daxwaza xwe 16ê Gulanê li pêşiya Opereya Surreyayê kom bibin û bimeşin. Ev meş weke startekî ye. Heke di nava civakê de rêxistinbûyînek hebe ev ê bandora xwe li pêvajoyê jî bike. Tu hêz tune ye ku li pêşiya gelê ku rêxistinkirî bisekine. Heke li qadan yekîtiyek hê berfirehtir bê avakirin ev ê ji bo çareserkirina pirsgirêka Tirkiyeyê jî bibe bersivek. Ji bona wê jî em ê meşekê li dar bixin. Em 16ê Gulanê li benda gelê xwe ne ku em bi hev re banga aştiyê bilind bikin.”
