Navenda Nûçeyan – Li gundên navçeya Giyadînê xebatê madena siyanurê rê li ber valakirina gundan û koçberkirina gel vedike. Jinên gundê Ûlîkentê diyar kirin ku ew bi gefa siyanurê re rû bi rû ne.
Li navçeya Giyadîn a Agiriyê Koza Holdîngê du sal berê xebatên siyanurê da destpêkirin. Maden li nêzî gundên Ûlîkent, Bilîgana Jor, Bilîgana Jêr, Seîd Beg, Mele Qede, Gêdûk, Tendurekê hat avakirin û ji ber vê gundî neçar man erdên xwe bifroşin û terk bikin. Di rewşa ku xebatên madenê bidomin de wê gundî gundên xwe terk bikin û koçber bibin.
Ji bo gundî erdên xwe bifroşin gef li wan hatine xwarin
Piranî gundiyan ji ber madenê erdên xwe firotine û koçber bûne. Gundiyên Ûlîkent, ev du sal e li dijî madenê li ber xwe didin û xwedî li axa xwe derdikevin. Gundiyan diyar kirin ku dema nû maden hatiye vekirin ji bo ku erdên xwe bifroşin hatine tehdîdkirin.
Jinên gundê Ûlîkent derbarê xebatên madenê de ji JinNewsê re axivîn.
‘Dînamîtan diteqînin, malên me dihejin’
Mazlume Taylan da zanîn ku ew madenê naxwazin û qebûl nakin û wiha got: “Hemû netewan her tim îxanet, heqeret û zilm li me kirin. Em vî mafî nadin kesî. Bila hemû ji vir biçin. Dînamîtan ditewînin û malan dihejînin. Em ditirsin malên xwe de razên. Em nizanin çima evqas dînamît diteqînin. Em naxwazin. Ya wê me bikujin ya jî surgun bikin. Ji sala borî de em têdikkoşin. Ev zilm e.”
‘Pere pêşniyar dikin em qebûl nakin’
Mazlume Tayhan got ji ber teqîna dînamitan nikarin bi rehetî karê xwe bikin û got: “Maden xetereyek mezine. Behsa derxistina jehrê tê kirin. Me nafikirin. Em qebûl nakin. Pere pêşniyar dikin, ez bi yek mûçeyê debarê dikim dîsa jî qebûl nakim.”
‘Di her alî de zirar e’
Jina bi navê Ferîce Engîn jî wiha got: “Em gundê xwe terk nakin. Tu fêdeya madenê tuneye. Em naxwazin. Maden xetereya mezine. Em sewalkariyê dikin. Em ê sewalan li ku derê biçêrînin?Ji bo zarokên me bi zirare. Em ava çeman dixwin. Em firaqan pê dişon. Di her alî de zirare. Gundê me li ser axê maye. Em ji gundê xwe dernakevin. Ev warê me ye. Em warê xwe bernadin. Em li dijî madenê berxwe didin.Gotin axa xwe bifroşin. Lê me qebûl nekir. Em dizanin ku xetereyek mezine. Em ê gundê xwe bernedin û berxwe bidin.”
‘Em li gundê xwe madenê naxwazin’
Jina bi navê Yildiz Engîn jî destnîşan kir ku wê maden gundê wan hilweşîne û wiha axivî: “Dînamîtan diteqînin. Gund nav axê de dimîne. Em li gundê xwe madenê naxwazin. Em çi ku derê? Li ber mala me şîrketek vekirine. Zarokên me nikarin derkevin deve. Ev xetereye. Ji bo sewalên me xetereye.Em gundên xwe bernadin.”
‘Zarokekî me jiyana xwe ji dest bide em ê çi bikin?’
Nerîman Ozer jî wiha bi lêv kir: “Em şîrket û madenê naxwazin. Bi rojan dînamît teqandin. Em vê şîrketê naxwazin. Ev warê me ye. Zirarê dide me. Em ji ber axê bi rojan ji malên xwe dernakevin. Em nikarin karê xwe bikin.Zarokên me li derve dilîzin, di teqandina dînamîtê de tiştek were serê zarokên me em ê çi bikin? Em ji ber jehrê bimrin wê çi bikin? Em axa xwe nafiroşin. Em li vir hatine dinê. Em ê li vir bimirin.”
‘Em naxwazin vê bi warê me bikin’
Nuran Demîr jî diyar kir ku maden ji bo gundiyan ji bo herêmê zirarek mezine û dibêje: “Ji ber dînamitan hemû herêm bi bandor dibe. Gund nav axê de dimîne. Em nikarin derkevin derve. Çemê ji gundê me derbas dibe heta Çemê Firatê diçe. Ev zirarek mezine. Em qebûl nakin. Em naxwazin vî bi warê me bikin. Berxwedana me wê bidome.”
