Grûba muzîkî ya namdare Koma Amed çarçewaya Şayîyanê Wisarî yê Artuklu de dimayê ke serrî derbas bîyî Mêrdîn de vejîyaya sehneyî ser û bi hezaran kesan rê deyîrê xo vatî. Parlamentera Mêrdînî Berîtan Guneşe qisey kerd û bal ante muhîmîya 15ê Gulane Roşanê Ziwanê Kurdkî ser.
Şayîyê Wisarî yê ke hetê Şaredarîya Artuklu ya Mêrdînî ra yenê viraştene, roja 3. de meydanê fuarî de konser da. Tewlî hemserekanê Şaredarîya Girdî ya Mêrdînî û Artuklu bi hezaran kesan warê konserî kerd pirr. Hemserekanê ke vejîyayî sehneyî ser û şar silam kerd. Parlamentera DEM Partî ya Mêrdînî Bêrîtan Guneşe zî qisey kerd û bale ante muhîmîya 15’ê Gulane Roşanê Ziwanê Kurdkî û aşma gulane ser. Bêrîtan Guneşe dîyar kerd ke pawitiş û averberdişê ziwanê ma ye, bingeyê estbîyayîş û kulturê şarî yo. Bi hezaran kesan bêmabên sloganê “Ziwanê ma rûmetê ma yo” û “Bijî Serok Apo” berz kerdî.
Badê ke qiseykerdişî qedîyayî, grûba muzîkî ya namdare Koma Amed dimayê mabênê demêko dergî ra Mêrdîn de vejîya sehneyî ser. Bi hezaran muzîkhesan ke meydan pirr kerdbî, bi asayena grûbe ra heyacanê girseyî resa astêka berze û bi yew vengî hemrayîya deyîranê klasîk û nêvîraşîyayê grûbe kerd. Taybetî tewrbîyayîşê cîwanan, kaykerdişê govende û tîlîlîyê dayîkan rengê xo da şewe. Welatijê ke seba vînayîşê grûbe her hetê şaristanî ra herikîyayî meydan, dîyar kerd ke îradeyê şaredarîyan û vengê Koma Amedî ruhê wisarî Mêrdîn de gandar kerdo.
Konser bi berzkerdişê sloganan qedîya.
