Endama Meclîsê Şaredarîya Artemêtî Medya Mermite dîyar kerd ke projeyê ‘Bostanê Komunî yê Cinîyan’ tewrbîyayîşê cinîyan ê berardene de xurt kena û sey modelêkê ekolojîkî û cuya hempare vejîyena vernî û wina vat: “Tîya de cinîyî tenê zerzewatan nêramênê, eynî wext de cuya xo ya hempare zî hîra kenê.”
Endama Meclîsê Şaredarîya Artemêtî Medya Mermite serê amancê projeya ‘Bostanê Komunî yê Cinîyan’ ke hetê Şaredarîya Artemêtî ya Wanî ra yena rayra berdene, qisey kerd.
Medya Mermite dîyar kerd ke ê bi na proje cinîyan yew cayê hemparî de anê pêser û wina vat: “Tîya de cinî tena zerzewatan nêramenê, eynî wext de qeraran pîya danê û cuya xo ya hempare hîra kenê. Bostanê Komunanê Cinîyan keda cinîyan ana verê çiman. Zanayîş û tecrubeyanê cinîyan vejîyena vernî. Eynî wext de ma armanc kerd ke cayê cuya ekolojîkî virazê ke cinîyî bieşkê bi keda xo berardene bikerê.”
Endama Meclîsê Şaredarîya Artemêtî Medya Mermite bale ante serê eleqeya xurte ya cinîyan a vera projeyî û nê çîyî vatî: “Rastîya ke cinîyî nê cayan rê wayîr vejîyenê, ma hîna zêde motîve kena. Demê ameyoxî de ma amanc kenê ke cayê bostanan hîra bikerê, hîna zêde cinîyan tewrê nê cayanê beradene bikerê û hewldayîşê hemkarîye xurt bikerê.
Mesajo sereke ke ma wazenê bidê cinîyan o yo ke; keda cinîyan zaf biqîmet a û mimkun o ke ma bi berardena pîya hîna xurt bibê. Nê cayî tena bostanî nîyê; cayê geşkerdişê paştîdayîş, parekerdiş û cuya hempare yê. Reyna ma plan kenê ke taxa xo ya Firatî de bostanê şaristanî yê cinîyan û merkezê cuya cinîyan abikerê. Ma heme embazanê xo yê cinîyan dawetê abîyayîşî kenê”
