Sîyasetmedarê Fransî Dylan Boutiflat ke Sûrîyeya Vakur û Rojhelatî zîyaret kerdo, dîyar kerd ke vera êrîşanê Tirkîya de têkoşînêko pêroyî est o û va “Rojava seba ameyoxî yew model pêşkêş kena.”
Sekreterê Têkilîyanê Mîyanneteweyî yê Partîya Sosyalîstî ya Fransa Dylan Boutiflat derheqê zîyaretanê xo de ANF’yî rê qisey kerd. Boutiflat va ke amancê zîyaretê înan o yo ke herême de çi beno nêzdî ra biewnîyê û înan bi taybetî waşt ke êrîşê Tirkîya û grûbanê girêdayan nêzdî ra bivînê.
Boutiflatî bale ant ke Bendawa Tişrîne de û cayê şerî de hem sivîlî hem zî şarê herêmî pêşengîya têkoşîne kenê. Ey va “Camêrdî û cinîyî her roj seba ke resayîşê awe garantî bikerê û vernîya kontrolê tirkan û mîlîsanê înan bigîrê şer kenê.”
Ey qeyd kerd ke zafê herêman zîyaret kerdî û înan bi taybetî Reqa de kesê ke Efrîn ra ameyê dîyî. Boutiflat îfade kerd ke çîyo ke ey tewr zêde tesîr kerdo sistemê Rojava yo ke tede qewet mabênê cinî û camêrdan de yeno parekerdene.
Boutiflatî bale ant bêtehemulîya komelî mîyanneteweyî û va “Na rewşe seba vatişê grûbanê cîya-cîyayan û rêzgirewtişê înan de pabestîya demokrasîye lazim a. Coka ganî Rojava û grûbê ke tede ca gênê planê awan û îdarekerdişê Sûrîyeya ameyoxî de cayê xo bigîrê.”
Sîyasetmedarê Fransî va ke 13ê sibate de Qesrê Elysee de konferansê derheqê ameyoxê Sûrîya de virazîyeno û înan waşt ke Macron tena serekê neweyî yê Şamî nê, heme hêzê ke cayê cîya-cîyayan ê Sûrîya ra yê dawet bikero. Ey va “Eke Serekomar Macron temsilkarê Îdareyê Xoserî dawetê konferansê Elyseeyî nêkero, ma do înan dawetê Meclîsê Neteweyî bikê û ma do înan rê pêşnîyaz bikê ke bêrê Parlamentoyê Fransî de qisey bikerê.”
