Bi hezaran kes beşdarî mîtînga li qada stasyonê bûn. Di mîtîngê de posterên Rêberê PKKê Abdullah Ocalan, rojnameger Nazin Daştan, Cîhan Bilgîn, Gulistan Tara û Hêro Bahadîn ên bi SÎHAyan hatin kuştin rakirin. Di mîtîngê de li ser navê Dayikên Aştiyê Havva Kiran axivî û got: “Em destê xwe bidin hev û bi hev re aştî û aramiyê bînin.”
Bi hezaran welatî ji bo mitînga “Aştî û Azadiyê” ya li qada Stasyonê ya Amedê kom bûn û ji bo aştî û azadiyê qêrîyan. Li qada mitîngê posterên Rêberê PKKê Abdullah Ocalan, rojnamevan Gulistan Tara û Hêro Bahadîn ku di meha tebaxê de li Silêmaniyê ji aliyê SÎHAya dewleta Tirk ve hatibûn kuştin, hatin hildan û gerandin. Her wiha posterên rojnamevan Nazim Daştan û Cîhan Bîlgîn ku li rojavayê Kurdistanê di encama êrişa SÎHAya dewleta Tirk de hatin kuştin, hatin hildan.
Di mîtîngê de li ser navê dayikên aştiyê Havva Kiran axivî û wiha got: “Li ser navê hemû dayikên aştiyê silavên xwe dişinim. Îro mîtînga azadî, aştî û wekheviyê ye. Gelê kurd her dem aştî û azadî xwestiye. Em jî wekî dayikên aştiyê, her tim aştiyê dixwazin. Îro roja şeref û namûsê ye. Divê her kes aştiyê bixwazin. Me wekî dayikên aştiyê 25 salin aştî, yekîtî û azadî xwestiye. Em kuştinê naxwazin. Em naxwazin tu kes bên kuştin. Rengê hêsirên dayikan tune ye. Êşa dayikên kurd û tirk yek in. Em bang li dayikên tirkan jî dikin. Em destê xwe bidin hev. Em bi hevre aştî û aramiyê bînin. Yek canê me heye. Em vî canê xwe jî ji bo aştiyê didin. Tişta herî pîroz zarokên dayikan e. Lê dema dayik zarokên xwe didin axê dîsa aştiyê dixwazin. Dema zarokên tirkan tên kuştin dibêjin “Bila welat sax be”. Welat dimîne lê zarokên wan diçin axê. Em bi hevre aştî û demokrasiyêbînin vî welatî. Şer ne tiştekî di rêzê de ye. Kes bi şer bi ser neketiye. Şer hezar salan jî bidome, divê dîsa aştî bê. Em dixwazin aştiyê hembêz bikin. Lê dayikan li şûna aştiyê darbest û cenaze hembêz kirin. Em êdî naxwazin darbest û cenazeyan hembêz bikin. Divê hemû cîhan û gelê Tirkiyeyê li ser rawestin. Lazim e bibêjin dayik aştiyê dixwazin.”
