MKGê û DFGê di çarçoveya 8ê Adarê Roja Jinên Cîhanê de ji rojnamegerên girtî re pirtûk û kart şandin.
Li Amed û Wanê, Komeleya Rojnamegerên Jin a Mezopotamyayê (MKG) û Komeleya Rojnamegerên Dîcle Firatê (DFG) bi minasebeta 8ê Adarê Roja Jinên Cîhanê ji rojnamegerên jin ên girtî re pirtûk û kart şandin.
Amed
Komeleya Rojnamegerên Jin a Mezopotamyayê (MKG), bi wesîleya 8ê Adarê ji rojnamevanên girtî re pirtûk û kart şandin. Rojnameger li postexaneya Ofîsê ya navçeya Yenîşehîrê ya Amedê hatin cem hev. Beriya kart û pirtûkan bişînin daxuyanî dan. Seroka MKGê Roza Metîna daxuyanî da.
Roza Metîna anî ziman ku bi boneya 8ê Adarê Roja Jinên Cîhanê hatin gel hev û wiha got: “Em ê li vir hem kart û hem jî pirtûkan ji rojnamegerên jin ên girtî re bişînin. Li gorî rapora MKGê, 10 rojnamegerên jin bi hinceta nûçeyên ku çêkirine niha di girtîgehê de ne. Ev êrîş li dijî azadiya ramanê ye. Rojnameger îro ji ber karên xwe bi awayekî derqanûnî di girtîgehê de ne. Heta ku li vî welatî rojnamevan azad nebin, em nikarin behsa hiqûq û azadiya ramanê bikin. Rojnameger di zûtirîn demê de bên berdan û bi serbestî nûçeyên xwe ragihînin. Weke rojnameger em ê dev ji ragihandina heqîqetê bernedin, tu carî serê xwe natewînin.”
Rojnameger piştî berzkirina dirûşma “Çapemeniya Azad nayê bêdengkirin” kart û pirtûk ji girtiyên jin ên rojnameger re şandin.
Wan
Li Wanê jî bi pêşengiya MKG û DFG, di çarçoveya çalakiyên 8ê Adarê de ji rojnamegerên jin ên girtî re name û kart hatin şandin. Rojnameger li postexaneya navendê ya Wanê kom bûn name û kart ji rojnamegerên girtî re şandin.
