Qiseykerdişanê pîrozkerdişê Newroze yê qezaya Sêwreg de bi hezaran kesî azadîya fîzîkî ya Abdullah Ocalanî waşte û wayîrvejîyayîşê vengdayîşê Rêberê Şarê Kurdî Abdullah Ocalanî yê 27ê sibate kerd.
Qezaya Sêwregî ya Rihayî de bi sloganê “Raybero Azad Komelo Demokratîk” û “Newroza Komelo Demokratîk seba azadîye” Newroze ameye pîrozkerdiş. Pîrozkerdişo ke kîşta Bazarê Genim ê rayîrê Wêranşarî de ame kerdene, parlementerê Partîya Têduştî û Demokrasîyî ya Şaran (DEM Partî) Ayten Kordu, Serhat Eren, Endamê Meclîsê Dayîkanê Aştî yê Rihayî, temsîlkarê rêxistinanê komelkîyan, hemşaredarê DEM Partî û bi hezaran kesî beşdarê pîrozkerdişî bîyî.
Meydano ke pîrozkerdiş tede ame kerdene, bi alayanê kesk, sûr û zerdan amebî xemilnayene, sehne de pankartê bi nuşteyê “Newroza komelo demokratîk seba azadîye” amebî aliqnayene. Welatijan ke bi cil û belganê xo yê neteweyîyan amebî meydanî, demêko derg govende girewte. Nuqtayanê kontrolî de polîsan vat qedexe yo ke kesêk bi solanê ke markaya ci Mekapî ya, bêro meydanê Newroze. La şarî astengî nas nêkerdê û bi solanê Mekapî kewtê meydanî.
Pîrozkerdişî de Komîteyê Amadekerdişî yê Newroze, hemserekê şaristan û qezayan ê DEM Partî û DBP’yî şarî silam kerd û venga wayîrvejîyayîşê vengdayîşê Rayberê Şarê Kurd Abdullah Ocalanî da. Pîrozkerdişî de xeylê reyî sloganî “Bijî Serok Apo”, “Koyan de mêgerê, Apocî her ca de yê” û “PKK şar o, şar tîya de yo” ameyî vatene.
Endama Meclîsê Dayîkanê Aştî Adalet Çayî Newroza Rayberê Şarê Kurd Abdullah Ocalanî pîroz kerde û wina va: “Ewro roşanê ma yo. Ma do serbikewê. Ma dayîkê aştî yê. Ma wazenê ke no şer biqedîyo. Ganî êdî dayîkî nêbermê. Ma tîya ra silaman erşawenê Îmrali û Rayber Apo rê.”
Parlamentera DEM Partî ya Dêrsimî Ayten Kordu bi kirmanckî Newroza şarî pîroz kerde û wina va: “Ma do Newroza xo bi ziwanê xo yê dayîke pîroz bikerê. Polîtîkaya înkarî seserrîyo ke yena kerdene. Şarî înkar kerdî. Silam bi heme can û heme embazanê ma yê ke xo feda kerdo. Newroza embazanê ma yê ke zîndanan de xover danê pîroz bo.”
Kordu Surîya de kiştişê elewîyan protesto kerd û wina dewam kerd: “Vizêr Kobanê de keyeyêk ame kiştene. Ma nê qirkerdişî protesto kenê. Mîmarê nê prosesî Rayberê Şarê Kurdî Abdullah Ocalan o û ey prosesêk da destpêkerdene. 27ê sibate de vengdayîşêk kerd. Ma do hetanî peynî nê vengî virar bikerê. Sey cinî ma do vengdayîşê rêzdar Ocalanî virar bikerê. Viraştişê Komelêka Aştî û Demokratîke berpirsîyarîya ma ya.”
Parlementerê DEM Partî yê Amedî Serhat Erenî zî wina qisey kerd: “Silam ê kesan rê ke tarixê Newroze nuşto. Newroze roja ê kesan a ke cuyêka newe virazenê. Silam seba ê kesan ke cuyêka newe virazenê. Newroze mizgînîya Kawayê Hesînkarî ya. Rayberê Şarê Kurdî Abdullah Ocalanî 27ê sibate de vengdayîşêko sey manîfesto kerd. Nê manîfestoyî de waştişê welatêk ke şarî eşkenê tede azad biciwîyê, îradeyê înan nêro xesbkerdene û her kes eşkeno xo bi hewayêko azad îfade biko, est o. Ma do nê vengî virar bikerê. Ganî hukmat cewabê nê vengdayîşo tarîxî bido û nê firsendî rind şuxulno. Seba ke rêzdar Ocalan rolê xo kay bikero ganî şert û mercê xebata azade bêrê vurîyayene.”
Badê qiseykerdişî adirê Newroze bi pêşengîya Dayîkanê Aştî ame wekerdene û sloganî “Bijî Serok Apo” ameyî vatene.
Pîrozkerdiş bi deyîranê Koma Perwer û deyîrbazan Bekîr Altayî û govende reyde qedîya.
