OHD, ÎHD, TUAY-DER û Baroya Amedê rapora sê mehî ya binpêkirina mafên girtiyan eşkere kir û di raporê de hat xwestin ku demildest dawî li pêkanînên kêfî were anîn û mafê hêviyê were bicihanîn.
Komeleya Mafê Mirovan (ÎHD) a Şaxa Amedê, Komelaya Hiqûqnasên Ji bo Azadiyê (OHD) a Şaxa Amedê, Komeleya Piştevaniya bi Malbatên Girtiyan re (TUAY-DER) û Baroya Amedê ji bo binpêkirina mafê girtiyan li avahiya OHDê ya Amedê rapora mehên Çile, Sibat û Adarê bi civînek çapemeniyê eşkere kirin. Endam û rêveberên saziyan û gelek parêzer tev li daxuyaniyê bûn. Endamê Komîsyona Girtîgehan a OHDa Amedê Ahmet Guler raporê xwend.
Rapora girtîgehên Amed, Xarpêt, Erzîngan û Erziromê
Ahmet Guler diyar kir ku li girtîgehên Tirkiyeyê, mafê girtiyan tê binpêkirin û wiha axivî: “Ji bo di hêla binpêkirinên mafan de ku qewimî ne, li cih bên tespîtkirin, me wek van saziyan li girtîgehên Amed, Xarpêt, Erzîngan û Erziromê serdanan pêk anî û derbarê binpêkirinên ku li girtîgehan qewimîne de rapor amade kir. Bi vê raporê hatiye armancakirin ku em dîtin û pêşniyarên xwe yên di derbarê pirsgirêkan de bi raya giştî re eşkere bikin.”
‘Pêwîst e mafê hêviyê were bicihanîn’
Ahmet Guler destnîşan kir ku pêşiya her tiştî divê binpêkirinên mafên mirovan ên li girtîgehên li Tirkiyeyê bên bidawîkirin, şert û mercên giran ên înfazê bên sererastkirin û wiha axivî: “Sepanên tecrîdê yên demdirêj ku li ser birêz Abdullah Ocalan, Omer Hayrî Konar, Hamîlî Yildirim û Veysî Aktaş ku li Girtîgeha Îmraliyê tên girtin demeke dirêj e berdewam dike werin bidawîkirin û biryarên binpêkirinê yên DMMEyê li ber çavan werin girtin û mafê hêviyê were bicihanîn. Divê gavek beriya gavekê feraseta tecrîdê bi dawî bibe.”
‘Rêveberiyên girtîgehan bi kêfî nêzî girtiyan dibin’
Ahmet Guler da zanîn ku gelek girtiyên ku cezayên wan qediyane û divê bên berdan, bi biryarên kêfî yên rêveberiyên girtîgehê an jî yên Lijneya Çavdêriya Îdarî nayên berdan û ji azadiya xwe bêpar tên hiştin. Ahmet Guler xwest ku Lijneya Çavdêriya Îdarî demildest dawî li kiryarên xwe yên kêfî bîne.
‘Divê derbarê kiryarên derhiqûqî de lêpirsîn bê destpêkirin’
Ahmet Guler bi bîr xist ku divê pirsgirêkên ku girtî di warê ragihandinê û serlêdanên nivîskî de dijîn bên çareserkirin û got ku ew daxwaz dikin ku derbarê peywîrdarên ku kiryarên derhiqûqî dikin lêpirsînên bi bandor bên destpêkirin.
