Amed – Hevberdevka HDKê Meral Daniş Beştaş ku tev li Konferansa Parlamenterên Jin ên Kurd a li Amedê hate lidarxistin bû destnîşan kir ku divê “Mafê Hêviyê” demildest bê pêkanîn û diyar kir ku ji bo aştî pêk were divê li Meclisê demildest komîsyonek were avakirin.
Hevberdevka Kongreya Civaka Demokratîk (HDK) û parlamentera DEM Partiyê ya Erziromê Meral Daniş Beştaş ku tev li Konferansa Parlamenterên Jin ên Kurd a li Amedê hate lidarxistin bû li ser mafê hêviyê û pêvajoya heyî ji ajansa me re axivî.
Meral Daniş Beştaş diyar kir ku di pêvajoya heyî de divê tecrîda li ser Rêberê Gelê Kurd were rakirin û wiha got: “Ev pêvajo hêdî hêjî jî be dimeşe. Hevdîtin berdewam dikin. Şandeya me diçe Îmraliyê bi birêz Abdullah Ocalan re hevdîtinê dikin lê belê hêj jî daxwaza me nehatine bi cih. Ji ber ku wexta muxatabê sereke di zindanê de be û neazad be têkiliyên wî xurttir nebe, kî bixwaze divê pê re hevdîtinê bike. Siyasetmedar, rewşenbîr, rojnameger nikarin biçin ev yek hêj girêdayî Wezareta Dadê ye. Em vê daxwazê her tim tînin ziman. DMMEyê jî derbarê mafê hêviyê de biryarek dabû. Divê mafê hêviyê pêk were û qanûn bên guhertin. Dewlet Bahçelî jî ev bang kiribû û gotibû divê mafê hêviyê were bikaranîn. Hîn hevdîtinin berdewam dikin lê gavên zelal hêj nehatine avêtin. Lê ji bo ku ev pêvajo baş biçe, hevdîtinan bi awayekî wekhev pêk bên, bingeha wê zêdetir xurt bibe divê ev yek pêk were.
‘Mafê hêviyê dê azadkirina birêz Ocalan siviktir bike’
Meral Daniş Beştaş destnîşan kir ku azadbûna Rêberê Gelê Kurd Abdullah Ocalan û girtiyên din ên siyasî ne girêdayî guhertina destûra bingehîn e û wiha domand: “Dikarin ji Meclisê qanûnekê derxin. Rêya guhertina destûra bingehîn dirêjtir e. Divê hevdîtin çêbibin, xalên wê bên aşkerekirin. Ji ber vê yeke em wê cuda difikirin. Lê ji aliyê mafê hêviyê ve azadkirina birêz Ocalan siviktir e. Ev yek dikare zû jî pêk were.”
Xebat û têkoşîna HDKê
Meral Daniş Beştaş, da zanîn ku weke HDK bênavber xebatên aştî û civaka demokratîk dimeşînin û ev tişt gotin: “Em ne bi tenê gelê Kurd re, bi gelên Tirk, Ereb re, bi civaka Elewiyan, jinan, ciwanan û herkesê re em vê pêvajoyê dinirxînin. Em civînan pêk tînin nêrînên wan digirin. Heta ku em bikaribin em vê xebatê bi awayekî berfireh didomînin. Me di meha Sibatê de konferanseke navnetewî jî pêk anî bû. Me gotibû çareserî di aştiyê de ye. Ji bilî wê li Behrareş, Behraspî, Çûkûrovayê, Egeyê, Anatoliya Navîn me gelek civîn pêk anîn. Ji Konyayê heta Ordû û Gîresûnê em diçin gelek deran û weke HDK xebatên xurt dimeşînin.”
‘Divê demildest li Meclisê komîsyon bê avakirin’
Meral Daniş Beştaş diyar kir ku divê komîsyona ku di Meclisê de were avakirin zû were ava bibe û wiha dirêjî da axaftina xwe: “Serokê Parlamentoyê daxuyaniyek da got ji bo gavavêtinê êdî dor dora Meclisê ye. Qanûnên ji bo çareseriyê dê li Meclisê derkevin. Destûra Bingehîn dê li wir derkeve. Divê gazî hemû partiyan were kirin, civîn pêk bên û ji niha pê ve divê ew komîsyon ava bibe û xebat bên destpêkirin. Wê kîjan qanûn derkevin, ji kîjan alî ve guhertin çêbibin? Mînak divê em ji aliyê qeyûman ve di demekî nêz de guhertinan çêbikin. Bi hezaran hevalên me yên girtî hene. Berdana wan û girtiyên nexweş di rojevê de ne. Bila rojek beriya rojekê ev komîsyon ava bibe.”
‘Ji bo xweşiya jiyanê divê em aştiyê pêk bînin’
Meral Daniş Beştaş axaftina xwe bi van gotinan bi dawî kir: “Ev pêvajo ji bona me hemûyan e. Ne tenê ji bona gelekê ye, ne tene ji bona gelê Kurd e, gelê Tirk e. Ji bona hemû gelên Tirkiyeyê dijîn e. Ji bo hemû bawerî, çand, nasnameyan e. Divê di vê pêvajoya aştî û civaka demokratîk de wekheviyê gelên Kurd û Tirk û gelên din pêk were. Bila herkes alîkariyê bide vê pêvajoyê, ji ber ku jiyana me ya di pêşerojê de xweştir û baştir bibe divê em aştiya xwe pêk bînin.”
