Xizmên kesên hatine windakirin li Amed, Êlih û Comemêrge çalakiyên xwe îro jî berdewam kirin. Xizmên windakiriyan anîn ziman ku ji bo aştî pêk bê divê hestiyên xizmên wan bidin wan û hesab bê pirsîn
Xizmên Windakiriyan û Şaxên Komeleya Mafên Mirovan (ÎHD) yên Amed, Êlih û Colemêrgê wekî her hefteyê vê hefteyê jî bi boneya “Bila winda bên dîtin û kujer bên darizandin” çalakiyên xwe berdewam kirin.
Amed
Şaxa ÎHDê ya Amedê û xizmên windayan di hefteya 852an de li Parka Koşuyolu li pêş Bîrdariya Mafê Jiyanê kom bûn û daxuyanî dan. Xizmên windayan pankarta mezin ku wêneyê windayan li ser e vekirin û wêneyên windayan hilgirtin. Xizmên windayan vê hefteyê aqûbeta Vasif Ozturk ê di 1ê hezîrana 1994an de li Gundê Cimarê yê Navçeya Pasûra Amedê hat windakirin pirsîn. Rêveberê Şaxa ÎHDa Amedê Yakup Guven, bi zaravayê Kirmanckî axivî û bal kişand ser çîroka Vasif Ozturk. Yakup Guven, anî ziman ku 31 sal berê Vasif Ozturk bi darê zorê hat revandin û hin aqûbeta wî nediyar e. Yakup Guven xwest kesên ku Vasif Ozturk revandine bên darizandin û aqûbeta Ozturk ronî bikin.
Êlih
Şaxa ÎHDê ya Êlihê û xizmên windrayan li Êlihê jî di hefteya 688an de li Kolana Gulistanê kom bûn bi heman armancê daxuyanî dan. Di çalakiyê de nûnerên OHD, MEBYA-DER û parazvanên mafên mirovan amade bûn. Xizmên windayan vê hefteyê aqûbeta Îsmaîl Agaya yê di 28ê Gulana 1994an de hat revandin û windakirin pirsîn.
Colemêrg
Şaxa ÎHDê ya Colemêrgê û Xizmên Windayan li Geverê jî di hefteya 178an de Kolana Hunerê ya Geverê kom bûn û daxuyanî dan. Xizmên windayan di çalakiyê de pankarta “Kujer diyar in, winda li ku nep?” û “Bila winda bên dîtin û kujer bên darizandin” vekirin. Vê hefteyê aqûbeta Savaş Buldan, Adnan Yildirim û Haci Karay ên ku 31 sal berê di 3ê Hezîrana 1994an de hatin revandin pirsin.
