Amed – Rojnameger Kenan Kirkaya bal kişand ser banga Rêberê Gelê Kurd Abdullah Ocalan û wiha got: “Ev serdem ne tenê ji bo Kurdan ji bo Tirkiye û Rojhilata Navîn jî rêya çareseriyê nîşan dide.” Parlamenter Serhat Eren jî wiha got: “Pêwîste ku di warê hiqûqî de gav bên avêtin. Ev astengiyên li pêşiya siyaseta demokratîk bên rakirin. Ji ber vê jî divê bi lezgînî komîsyonek bê avakirin.”
Komeke endamên PKKê dê li ser banga Rêberê Gelê Kurd Abdullah Ocalan sibê li bajarê Silêmaniyê yê Herêma Kurdistana Federe merasîma çek şewitandinê li dar bixe. Komeke ku siyasetmedar, rewşenbîr, rojnameger, nivîskar û endam û rêveberên saziyên sivîl di nav de li Amedê kom bûn û îro ber bi bajarê Silêmaniyê ve bi rê ketin. Rojnameger Kenan Kirkaya û Parlamenterê Partiya Wekhevî û Demokrasiyê ya Gelan (DEM Partî) Serhat Eren jî di nava vê komê de cih digirin. Kenan Kirkaya û Serhat Eren banga Rêberê Gelê Kurd Abdullah Ocalan û merasîma çek şewitandinê ya komeke endamên PKKê nirxand.
Rojnameger Kenan Kirkaya diyar kir ku merasîma çek şewitandinê ya komeke endamên PKKê gaveke dîrokî ye û wiha got: “Ev yek dê guherîneke mezin çêbike. Hem li ser siyaseta Tirkiyeyê hem li ser rewşa Kurdan hem jî li Rojhilata Navîn dê bandoreke mezin bike. Bêguman ev gavên dîrokî bi îradeya birêz Abdullah Ocalan tên avêtin. Birêz Ocalan înîsiyastîf girt di 27ê Sibatê de bangawaziyek kir, piştî 26 salan duh me dengê wî bihîst, rayagiştî dîmenê wî dît. Ev bi tena serê xwe geşedanek pir mezin e.”
‘Em ê di rojên pêş de bandora bangê hîn zelaltir bibînin’
Kenan Kirkaya da zanîn ku Rêberê Gelê Kurd Abdullah Ocalan 26 sal in di bin tecrîdeke giran de ye û wiha domand: “Li gel vê yekê jî bandora xwe li ser siyasetê li ser geşedanên Rojhilata Navîn didomîne bi her du bangawaziyên wî deriyên tecrîdê hineke din vebûn. Du caran bangawazî kir, van bangawaziyan atmosfera siyasetê guhert. Ji ber vê yekê em dibînin ku bandora birêz Ocalan hem ji bo çareseriyê hem ji bo avakirina rê û rêbazên nû çiqas mezin e xwedî bandoreke çawa ye, ev cardin hate misogerkirin. Bêguman di daxuyaniya wî de tespîtên girîng hene. Behsa pêvajoyeke nû, serdemeke nû dike. Ev serdem ne tenê ji bo Kurdan ji bo Tirkiyeyê ji bo Rojhilata Navîn rêya çareseriyê dide nîşandan. Ji ber vê yekê girîng e û em ê di rojên pêş de bandora vê yekê hîn zelaltir bibînin.”
‘Pêwîste di warê hiqûqî de gav bên avêtin’
Parlamenterê Partiya Wekhevî û Demokrasiyê ya Gelan (DEM Partî) Serhat Eren jî diyar kir ku di banga Rêberê Gelê Kurd Abdullah Ocalan de gelek daxwaz hebûn û wiha got: “Peyamên wî hem ji dewletê re hem ji rêxistina xwe re hem ji siyaseta demokratîk re hem ji partiya me û rayagiştî re hebûn. Du xalên girîng jî hebûn. Digot ‘Em êdî şûna şerê çekdarî siyaseta demokratîk esas digirin’ lê ji bo wê jî pêwîste ku di warê hiqûqî de jî gav bên avêtin. Ev astengiyên li pêşiya siyaseta demokratîk, têkoşîna demokratîk divê bên rakirin. Ji ber vê jî divê bi lezgînî komîsyonek bê avakirin. Ev komîsyon qanûnên azadiyê derxîne. Ev çi ne. Ji bo kesên çek berdidin tev li civak, jiyan û siyaseta demokratîk bibin divê qanûn bên derxistin. Ev xala yekemîn e. Lazim e em şênber bikin ka rol û mîsyona Meclisê çi ye. Ya duyemîn divê polîtîkayên qeyûm bên terikandin. Her wiha ji bo xwe îfadekirinê gelek astengî hene. Di warê xwe bi rêxistinkirinê de jî gelek astengî hene. Lê di pêşerojê de astengî li pêş siyaseta demokratîk bên rakirin ku pişt re merheleyeke din dest pê bike. Ew jî di warê ziman, nasname û çandê de jî hinek gav bên avêtin. Asta sêyemîn jî ji bo destûra bingehîn a sivîl bê afirandin divê gav were avêtin. Lazim e piştî vê saetê ne tenê parlamento partiyên siyasî, sazî û dezgehên sivîl, rayagiştî herkes vê pêvajoyê biparêze û ji bo ku ev pêvajo bigihe encamekê ji destê kê çi were divê bike.”
‘Divê dewlet qanûnan derxîne ku gerîla tev li siyaseta demokratîk bibin’
Serhat Eren bal kişand ser merasîma çek şewitandinê ya komeke endamên PKKê û wiha domand: “Komeke gerîla dê di merasîmê de bêjin ‘ji bo ku em bibin bersiva banga birêz Ocalan me biryara çekberdanê daye, em dixwazin tev li siyaseta demokratîk bibin lê qanûn nehatine derxistin em nikarin werin em dixwazin werin lê derfetên me nîne. Divê dewlet qanûnan derxîne ku em tev li siyaseta demokratîk bibin’. Ji bo ku tev li merasîmê bibin daxwaza 300 kesên ku endam û rêveberên partiyên siyasî, saziyên sivîl ên civakî hebûn ku ji bo tev li merasîmê bibin lê bi rastî derfet ewqas nîne. Ji bo wê nêzî 130 kes nûnerên saziyên sivîl û endamên partiyên siyasî em ê bi rê bikevin û bibin şahidê vê roja dîrokî. Em ê sibê dora saet di 10.30an de bigihin cihê merasîmê.”
