Merasîmê îmhakerdişê çekan ê Grûba Aştî û Komelê Demokratîkî çapemenîya dinya de gulbang da.
Grûbêka PKK’yî ya ke 30 kesan ra ameyêne pê, vengdayîşê Rayberê Şarê Kurdî Abdullah Ocalanî ser o merasîmê îmhakerdişê çekan kerd. Merasîmê Grûba Aştî û Komelê Demokratîkî çapemenîya dinya de gulbang da.
Ajans û rojnameyê sey Reuters, BBC, ABC News, The Irısh Times, NBC News, DW û ûsn.. gama ke ameya eştene sey, “Gamêka pîl a ke tena Tirkîya de nê, do Rojhelatê Mîyanênî ser o tesîr bikera.” erjnaye.
Reutersî veşnayîşê çekan ê PKK’yî sey, “gamêka sembol o la muhîm a” erjnaye. Xebere de ame dîyarkerdene ke qada merasîmî de ewleyî zaf bîye. Dewamê xebera xo de Ajansî ca da qiseykerdişê rayedarêkê hukmatê Tirkîya ke vano: “Gamî tîya ra pey do ê bibê ke seba endamanê PKK’yî hetê qanûnî ra beşdarê komelê Tirkîya bibê û do seba başkerdişê komelî bibê. Reyna do seba teşwîqkerdişê pêkerdişî gamî bêrê eştene.”
BBC’yî bi sernameyê “PKK rayîrê qedînayîşê pêkewtişê ke Tirkîya de est ê, gamêka pîle eşte û çekî veşnayî” pare kerd. Xebere de detayê merasîmî ameyê vatene. Eynê wextî de detayê proseso ke vendgayîşê Abdullah Ocalanî ra pey dest pêkerdo zî dayê û vat ke tesîrê qerarê PKK’yî tena Tirkîya de nê do Iraq, Sûrîye û Îran de zî bêrê hîskerdene.
ABC Newsî zî ca da vatişê Abdullah Ocalanî yê “Çek ra ney la ez hêzê sîyaset û aştîya komelkî ra bawer kena” ke mesajo bi vîdeo da ca girewtêne û eşkerayîya Serekê Pêroyî yê MHP’yî Devlet Bahçelî ya merasîmî ra dima ameye weşanayene.
NBC Newsî zî bi vatişê “Merasîm seba qedînayîşê serewedaritişê bi desan serrî yo vera Tirkîya de yeno kerdene, sembolîk o la gamêka muhîm a” xebera xo daye.
DW’yî zî xebera xo de ca de qerarê fesihkerdişî yê PKK’yî û sebebê awanbîyayîşê aye.
No qerar do tesîrê Rojhelatê Mîyanênî bikero
The Straît Tîmesî zî xebera xo de ca da detayanê merasîmê PKK’yî û dîyar kerd ke no qerar do tesîrê Tirkîya, Iraq, Îran û Sûrîye bikero.
The Seattle Timesî zî dîyar kerd ke merasîmo ke ameyo kerdene, gama ewile ya şênbere ya prosesî bêçekbîyayîşî ya û ca da helwestê Devlet Bahçelî yê verê yê vera PKK’yî û eşkerayîya ey a dimayê merasîmî.
Al-Monitorî zî xebera xo bi sernuşteyê “Şervanê kurdî merasîmêko muhîm de çekê xo îmha kerdê” pare kerde. Xebere wina ame vatene: “Merasîm nîşaneyê qonaxa vîyartişê serewedaritişo çekdarî yê Partîya Karkeran a Kurdîstanî (PKK) yê sîyaseto demokratîk o û parçeyêka hîra ya hewldayîşê seba qedînayîşê pêkewtişanê demderg ê ke herême de dewam kenê, yeno vînayene.”
The Irısh Timesî zî xebera xo de vat ke merasîmê PKK’yî vengdayîşê Abdullah Ocalanî ra pey ameyo kerdene û do tesîrêko pîl Tirkîya û Rojhelatê Mîyanênî ser o bikero.
