Heyetê DEM Partî yê Îmraliyî pêvînayîşê Wezîrê Edaletî ra pey eşkerayî daye û wina vat: “Eke zemînê prosesî yo huqûqî zixm bo, proses do hende ver bi netîce şêro. Wezîrê Edaletî zî beyan kerd ke ê do hinî asta tewr berze de destek bidê prosesî.”
Heyetê DEM Partî yê Îmraliyî Wezîrê Edaletî Yilmaz Tunçî reyde pêvînayîş kerd. Pêvînayîş qasê 45 deqayan dewam kerd.
Endamanê heyetî dima eşkerayîyêk daye çapemenî.
Pervîn Buldan îfade kerd ke înan pêvînayîşî de xerîtaya rayîrî ser o qisey kerdo û vat: “Ma hinî komîsyonî awan kenê. Tîya de rolê Wezîrê Edaletî do pîl bibo. Ma ey ra vat ke ganî proses zemînê huqûqî de bêro kerdene. Ey zî qebul kerd ke proses zemînê huqûqî ser o bêro averberdene û ê do wezîfeyanê xo bîyarê ca.”
Mîthat Sancarî vat: “Seba ke proses serkewo zemîno huqûqî şert o. Wezîrê Edaletî îfade kerd ke ê do naye ra pey asta tewr berze de destek bidê prosesî. Ganî zemîno huqûqî bêro xurtkerdene. Eke zemînê prosesî yo hiqûqî zixm bo proses hendê ver bi netîce do şoro. Wezîrê Edaletî zî beyan kerd ke ê do hinî asta tewr berze de destek bidê prosesî.”
Dima heyetî cewab da persanê rojnamegeran. Persê “Selahattîn Demîrtaş do vera bidîyo?’ ser o Pervîn Buldan vat: “Ma her çi qisey kerd la ma do detayan nêdê.”
Pervîn Buldan persê serê merasîmê çekveşnayîşî rê wina cewab da: “Prosesê çekverdayîşî do safha bi safha dewam bikero. Çekverdayîşî ra dima safhaya awankerdişê komîsyonî do bêra.”
Mîthat Sancarî persê ‘Gelo gerîlayê ke do çekî veradê tewrê sîyasetî bibê yan nê?’ ser o vat: “Safhaya komîsyonî de nê çîyî do bêrê nîqaşkerdene. Raşt nîyo ke nika ma çîyêkî vajê. Beno ke komîsyon no hewte bêro pêser. Komîsyon do nê heme babetan ser o vindero.”
