HPGê ragihand ku Fermandarê Akademiyên Apollo Metîn Arslan (Koçero Ûrfa) û ji pêşengên Şoreşa Azadiyê ya Rojava Nûreddîn Sofî jiyana xwe ji dest dane.
Li gorî nûçeya ANFê; Navenda Ragihandin û Çapemeniyê ya HPGê bi daxuyaniyekê ragihand ku Fermandarê Akademiyên Apollo Koçero Ûrfa û yek ji pêşengê Şoreşa Azadiyê ya Rojava Nûreddîn Sofî ku jiyana xwe ji dest dane. Di daxuyaniyê de hate diyarkirin ku Endamê Komîteya Navendî ya PKKê û Fermandarê Akademiyên Apollo Metîn Arslan (Koçero Ûrfa) di 4ê Mijdara 2019an de di êrîşeke hewayî ya dewleta Tirk de ku bi rêbaza sûîqestê pêk aniye jiyana xwe ji dest daye. Her wiha di daxuyaniyê de hate gotin ku şoreşgerê Kurd û yek ji pêşengê Şoreşa Azadiyê ya Rojava Nûreddîn Sofî jî di 6ê Nîsana 2021an di êrişek dewleta Tirk de jiyana xwe ji dest daye.
Daxuyaniya Navenda Ragihandin û Çapemeniyê ya HPGê ya têkildarî her du şoreşgeran de bi vî rengî ye:
“Yek ji xeleka şehadetê ya girîng ku xeta fedaîtiyê di asta herî bilind de temsî kir û her kêliya jiyana xwe da paşeroja azad a gelê me şehadeta hevrê Koçero Ûrfa ye. Endamê Komîteya Navendî ya partiya me PKKê û Fermandarê Akademiyên Apollo hevrê Koçero Ûrfa – Metîn Arslan di 4ê Mijdara 2019an de di êrişeke hewayî ya dewleta Tirk a dagirker de ku bi rêbaza sûîqestê kir, şehîd bû.
Ewladê leheng ê gelê Kurd, şoreşgerê profesyonel, şopdarê Fermandar Egîd, pêşengê Şoreşa Azadiyê ya Rojava hevrê Nûreddîn Sofî ku ji bo dîtina hevalên xwe yên berê, carek din berê xwe da çiyayên Kurdistanê ku 24 salên xwe lê derbas kiribû, di dema serdana li Fermandariya me ya Biryargeha Navenda Parastina Gel de 6ê Nîsana 2021an di êrişeke dijmin de şehîd bû.
Em hevrê Koçero Ûrfa û Nûreddîn Sofî bi hurmet, hezkirin, hesreteke bê dawî û hestên hevrêtiyê yên herî kûr bi bîr tînin. Em hevrêyên herî dilsoz ên Rêber Apo, şervanên leheng ên Fermandar Egîd, rêberên derwêşane yên têkoşîna me ku xwedî ruhê 15ê Tebaxê bûn bi rêzdarî bi bîr tînin û soza dilsoziya bi wan re dubare dikin.”
