Artêşa Îsraîlê ji bo kontrolkirina bajarê Xezeyê ku nêzî milyonek mirov lê dimînin dest bi operasyona bejahiyê kir.
Artêşa Îsraîlê ku di halê hazir de ji sedî 75ê Şerîda Xezeyê kontrol dike, ji bo dagirkirina bajarê Xezeyê jî dest bi operasyona bejahiyê kir. Li gorî texmînên artêşê, di nava hefteya dawî de 70 hezar kes neçar man ku ji bakur koçî başûr bikin. Rêveberiya Îsraîlê li bendê ye ku piştî operasyonê hefteyên li pêş dê bi sed hezaran kes ji cih û warên xwe koç bikin.
Bîlanço her ku diçe girantir dibe
Artêşa Îsraîlê di daxuyaniya xwe ya roja Çarşemê de îdîa kir ku ‘Li Xezeyê xela nîne’. Lê belê di bombardûmana heman rojê de li gorî Rêxistina Parastina Sivîl a Şerîda Xezeyê, di êrîşa Îsraîlê de 62 kesan jiyana xwe ji dest dan. Li gorî çavkaniyên Fîlîstînî ji destpêka şer û vir ve di êrîşên Îsraîlê de herî kêm 63 hezar û 746 kesan jiyana xwe ji dest dan.
Nîviya zarokan dê astengdar bimînin
Komîteya Mafên Astengdaran a Neteweyên Yekbûyî diyar kir ku ji destpêka şer û vir ve 21 hezar zarok bi rengekî mayinde astengdar bûn. Ev hejmar bi qasî zêdeyî nîvê zarokên birîndar bûne. Bi giştî 40 hezar û 500 zarok ji ber şer birîndar bûn.
Mûxalîfên Îsraîlî hikûmetê şermezar kirin
Li Îsraîlê komên muxalîf daketin qadan û hikumetê şermezar kirin. Di çalakiyên bi navê ‘Roja bênavberiyê’ de xwepêşandêran Serokwezîr Benyamin Netanyahu sûcdar kirin ku xwe nade ber agirbestê û dorpêçê giran dike. Benyamin Netanyahu jî çalakgeran bi gotina ‘Rêbaza milîsan bi kar tînin’ sûcdar kir.
