Li Cizîrê 22 kesên di qedexeya 4ê îlona 2015an hatî destpêkirin de jiyana xwe ji dest dayîn li ser gorên wan hatin bîranîn.
Li navçeya Cizîr a Şirnexê 4ê îlona 2015an ji aliyê dewleta tirk ve li ser tevahiya bajêr qedexeya derketina derve hatibû îlankirin û pêre êrîşên bi tank û topan hatibû destpêkirin. Di van êrîşan de zarok jî di nav de 22 welatî hatibûn qetilkirin. Di nav de parlamenterên DEM Partiyê yên Şirnexê Mehmet Zekî Îrmez, Newroz Ûysal Aslan û gelek endam û rêveberên DEM Partî û DBPê, her wiha xizmên kesên hatine qetilkirin çûn Goristana Mezin a Cizîrê û kesên hatine qetilkirin bi bîr anîn.
Destpêka bîranînê dua hatin xwendin. Piştre parlamenter Ûysal axivî û got ku ji 2015an ve kujerên van welatiyan nehatine darizandin, hesap nedane û wiha axivî; “Bi qedexe û êrîşên 2015-2016an xwestin xwerêvebirina gelê kurd asteng bikin. Bi van êrîşan xwestin peyama em destûrê nadin hûn xwe bi rêve bibin , bidin gelê me. Ev kesên qedexe îlan kirin û qetlîam pêk anîn heya îro jî nehatine darizandin.”
Ûysal herî dawî got ku gelê Kurd li hember van polîtîkayan duh jî li ber xwe daye û îro jî berxwedana xwe didomîne. Piştî axaftina Ûysal bîranîn bi dawî bû.
