MKG û DFGê bi şahiyekê Roja Çapemeniya Azad pîroz kir. Nûnerên saziyan anîn ziman ku çapemeniya azad her tim heqîqetê ronî dike û gotin: “Çapemeniya Azad meşaleya azadiyê ye.”
MKG û DFGê bi boneya 6ê Îlonê Roja Çapemeniya Azad li Konaxa Cemîl Paşa ya li navçeya Sûra Amedê bi dirûşma “Çapemeniya Azad Civaka Demokratîk” bernameya pîrozbahiyê li dar xistin. Hevserokê Partiya Herêmên Demokratîk (DBP) Keskîn Bayindir, Hevşaredarên bajar û navçeyan ên Amedê, nûnerên saziyên sivîl, rêveberên saziyên sivîl ên civakî, gelek rojnameger û malbatên rojnamegeran tev li şeva Roja Çapemeniya Azad bûn.
Pirozbahî bi deqeyeke rêzgirtinê ji bo hemû şehîdên Çapemeniya Azad û hemû şehîdên aştî û demokrasiyê dest pê kir. Piştî rêzgirtinê dirûşmên “Şehîd namirin” hatin berzkirin. Bi destpêkirina axaftinan wêneyên rojnamegerên ku hatine qetilkirin wek slayt hatin nişandan.
Seroka Rojnemegerên Jin ên Mezopotamyayê (MGK) Roza Metîna bal kişand ser dîrok û rola çapemeniya azad kir û bi bîr xist ku Çapemeniya Azad di demên darbeyê heya niha bêyî navber li ber xwe da. Roza Metîna diyar kir ku ji 6ê Îlona 1978an bi çapkirina Kovara Serxwebûnê ve îro wek Roja Çapemeniya Azad e û got: Bila ev roj bibe sedema civakekî azad û demokratîk. Em vê şahiya xwe diyarî vê rojê dikin û em ê tu caran bi pênûs û kamerayên xwe ve paş de gav neavêjin Em ê mîrateya Gurbetellî, Nazim, Gulistan û hemû hevalên xwe derkevin û keda wan li erdê nehêlin.
Hevseroka Komeleya Rojnamegeran a Dîcle Firatê (DFG) Kesîra Onen diyar kir ku her pêvajoya Çapemeniya Azad bi berdelên mezin derbas bû û got: “Em bi saya van berdêlan li vê derê ne. Em ê vê tu caran ji bîr nekin. Hêj ji ev zext û sansura li ser çapemeniyê berdewam dike. Heke pêvajoyek hebe dê ev pêvajo bi Çapemeniya Azad pêk were.”
Hevserokê Partiya Herêmên Demokratîk (DBP) Keskîn Bayindir li ser kevneşopiya Çapemeniya Azad sekinî û vê rojê li hemû rojnameger û gelan pîroz kir. û got: “Desthilat herî zêde ji Çapemeniya Azad ditirse. Hûn roj bi roj fireh dibe. Îro Çapemeniya Azad bûye meşaleya azadiyê.”
Hevşaredarê Şaredariya Bajarê Mezin a Amedê Dogan Hatun Roja Çepemiya Azad li hemû rojnamegeran pîroz kir û da zanîn ku Çapemeniya Azad bû dengê rastiyê, bû dengê dayikekê, bû denge zarokekê.
Piştî axaftinan Hunermend Kasim Taşdogan behsa serpêhatiya xwe ya rojnamegeriyê kir û bi bîr xist ku gelek keda hevalên rojnameger li ser hene. Kasim Taşdogan bi stranên xwe ve kesên ku tev li şevê bûne mest kirin. Rojnameger û kesên tev li bûne gelek caran tev li gotina stranan bû û govend gerandin.
