Wan – Siyasetmedarên Wanê banga tevlibûna Mitînga Azadiyê kirin û gotin: “Mitîng ji bo azadiya Rêberê Gelê Kurd, girtiyên siyasî û gelê Kurd gelek girîng e. Dê mitîng bibe bersiva pêvajoyê.”
Bi pêşengiya DEM Partî, DBP û TJAyê dê ji bo azadiya fizîkî ya Rêberê Gelê Kurd Abdullah Ocalan di 27ê Hezîranê de li Wanê û Mersînê û di 28ê Hezîranê de jî li Amed û Stenbolê bi dirûşmeya “Bi Rêbertiya Azad Ber Bi Azadiyê Ve” mitîng bên lidarxistin. Mitînga Wanê, wê li Qada Newrozê ya li ber Keleha Wanê ya navçeya Rêya Armûşê bê lidarxistin û hevserokê Giştî yê DBPê Keskîn Bayindir, aktivîsta TJAyê Sebahat Tûncel tev li mitîngê bibin. Wê Koma Amed, rapbêj Sîmyager û Beser Şahîn jî weke hunermend di mitîngê de derkevin ser dikê.
Siyasetmedarên Wanê armanca mitîngê vegotin û banga tevlibûnê li welatiyan kirin.
‘Divê qanûn bên derxistin’
Hevserokê DEM Partiyê yê Wanê Veysî Dîlekçî anî ziman ku armanca vê mitîngê azadiya fîzîkî ya Rêberê Gelê Kurd Abullah Ocalan û derketina qanûnên bingehîn yên demokratîk in. Veysî Dîlekçî got: “Di 27ê sibatê ya sala 2025an de bi pêşengiya Rêberê Gelê Kurd birêz Abdulah Ocalan bi bangawaziya aşitî û civaka demokratîk pêvajoyek dest pê kir. Bi vê bangê gelek gavên girîng hatin avêtin, PKKê gelek biryar standin û piştî wan biryaran divê ji aliyê dewletê ve jî gav bêne avêtin. Li ser vê esasê meclîsa Tirkiyeyê de komîsyonek hate avakirin, vê komisyonê jî li gel birêz Ocalan hevdîtin pêk anî û piştî vê hevdîtinê raporek hate amadekirin. Ji bo pêvajo baştir bi rê ve biçe divê bi lez û bez hinek qanûnên bingehin bêne çêkirin. Herî dawiye de birêz Ocalan ji bo çêkirina wan qanûnên bingehîn pêşniyariyên xwe rê kiribû. Li ser vê esasê jî divê qanûn bên derxistin ku pirsgirêk bi rêya siyaseta demokratîk çareser kirin.”
‘Em banga avêtina gavan bikin’
Veysî Dîlekçî dest nişan kir ku di wê pêvajoyê de dewletê çi gav ne avêtine û wiha berdevam kir: “Bendewariya sazî û rêxistinan , civaka Tirkiyeyê û gelê Kurdan ev e ku bi lez û bez gav bêne avêtin da ku pêvajo pêş ve biçe. Li ser vê esasê da ku em daxwazên gelên xwe bînin ziman, li çar navendên girîng mitîngên azadiyê dê werin lidarxistin. Di nav wan navendan de yek jî Wan e. Mitînga Wanê 27ê hezîranê roja şemiyê di seet 17:00an de li qada Newrozê ye. Em ê li wir bi sazî , rêxistin û siyasetmedarên xwe careke din ji bo çareseriya demokratîk bang bikin ku gav bêne avêtin.”
Giringiya azadiya Abdullah Ocalan
Di berdewama axaftina xwe de Veysî Dîlekçî bal kîşand ser fîzîkî ya Rêberê Gelê Kurd Abdullah Ocalan û got: “Em dizanin ku sermuzakerevanê vê pêvajoyê yek birêz Ocalan e. Divê şert û mercên birêz Ocalan bi lez û bez bêne guhertin û azadiya wî ya fîzîkî pêk bê. Birêz Ocalan divê di nav û şert û mercên azad de vê pêvajoyê rê ve bibe. Ji aliyeke din ve divê girtiyên siyasî û yên nexweş bêne berdan. Wekî din jî vîna gelê Kurd hatiye xesp kirin, divê ev vîn jî careke din bê bidestxistin. Ji ber vê ev mitînga me gelek girîng e.”
‘Em dê daxwaza azadiyê mezin bikin’
Veysî Dîlekçî anin ziman ku :”Em jî bang dikin li hemû gelê xwe , jin, ciwan, kedkar , kesên aşitîxwaz û kesên dixwazin nav civakek û komareke demokratîk de bijîn, dikin ku tev li vê meşa azadiyê bibin. Şert û mercên cîhanê û yên Rojhelata Navîn pêwîstiya demokrasiyê, azadî, aştî û aramiyê ferz dike. Pêwîstî ev e ku êdî pergala ku gelan qebûl nake û înkar dike, bê guhertin. Ji ber vê em ê jî bi vê mitîngê li gel gelê xwe daxwaza azadiyê bilind bikin, aşitiyê xwedî derkevin.”
‘Mitîng bersiva gava 27ê sibatê ye’
Hevserokê DEM Partiyê yê navçêya Tûşbayê Refîk Çîdal bal kişand ser azadiya Rêberê Gelê Kurd Abdullah Ocalan û got: “Ev mitîng ji bo azadiya Rêberê Gelê Kurd, civak û gelê bindest girîng e. Reberê Gelê Kurd 27ê sibatê gavek dîrokî avêt. Mitînga me jî bersiva vê gavê ye. Em dibejin ku tevahiya gelên cîhanê ji bo xwe çi dixwaze em Kurd ji bo xwe wê dixwazin. Em dixwazin gelê me teb li vê mitînga azadî û aştiyê bibe. Destê xwe bidin destê Reberê Gelê Kurd da ku destê me xurt bibe.”
‘Em dixwazin di mitîngê de daxwazên xwe rêz bikin’
Rêvebirê Dem Partiyê yê Wanê Ûmît Tayanir jî bal kişand ser girîngiya mitîngê û da zanîn ku ev mitîng ji bo azadiya Rêberê Gelê Kurd, girtiyên siyasî û gelê Kurd gelek girîng e. Umît Tayanir bi domdarî wiha axivî: “Ev mitîng divê bibe bersiva vê pêvajoyê. Di vê pêvajoyê de hêj gav nehatiye avêtin. Em dixwazin bi vê mitîngê, li qada Newrozê daxwaziyên xwe rêz bikin û gelê me jî başdarê vê mitîngê bibe.”
