Komîteya Dayîşûgirewtişî ya Vakur û Rojhelatê Sûrîyeyî dîyar kerd ke babeta entegrasyonê HSD’yî yê artêşê Sûrîye de pêkerdişê destpêkî ameyo kerdene.Komîteya Dayîşûgirewtişî ya Vakur û Rojhelatê Sûrîyeyî yê hukmatê demkî yê Şamî reyde platformê X’î ser o eşkerayîyêk pare kerd.
Eşkerayî de ame dîyarkerdene ke pêkerdişê destpêkî veradayîşê 3 beşanê HSD’yî sazgehê leşkerî yê artêşê Sûrîye ser o bîyo.
Eynê wextî de ame dîyarkerdene ke “bi rayîrê komîteyanê pispor ê her di hetan ra detayanê girêdayeyê rolan û awanîya rêxistine ser o munaqeşeyî yenê kerdene û yeno pawitene ke demê ameyoxî de gamê pratîkî bêrê eştene.”
Eşkerayîya komîteyî de ame dîyarkerdene ke na game, “piştgirîyêka mîyanneteweyî ya zelale gêna ke ver bi çareserîyêka sîyasî ya bingeyê dîyalogî ser o şona.”
Komîteyî eşkera kerd ke no weçînek seba teqezkerdişê îstîqrarî rayîro tewr realîst o û vat: “Her averşîyayîşêko şênber qedînayîşê şerê medya û vatişanê nefretî ferz keno.”
Komîteyî îfade kerd ke Sûrîye de rayîro tekane yê awankerdişê çareserîyêka domdare, pêkerdiş û hemkarî yo.
