Gerînendetiya Polîtîkayên Jinan a Şaredariya Peyasê xebatên xwe yên perwerdehî û hilberînê didomîne. Gerînendetî, çalakiyên cûda li dar dixe ku balê dikişîne ser bilindkirina hişmendiyê ya derbarê parastina zarokan û xurtkirina ked û hevgirtina jinan.
Atolyeya Parastina Zarokan
Armanca “Atolyeya Parastina Zarokan” a ku ji bo antrenor û xebatkarên Gerînendetiya Karên Ciwan û Sporê hate li darxistin, bilindkirina hişmendiya parastina zarokan di nav xebatkarên ku bi zarokan re dixebitin de ye. Di atolyeyê de li ser têgihiştina zarokan, di sporê de polîtîkayên parastina zarokan û mijarên îhmalkarî û îstîsmara zarokan hat sekinandin. Her wiha, li ser rêbazên ragihandina bi bandor bi zarokan re, şaşfêmkirinên berbelav û şêwazên tevgerînê yên bi tendurist nîqaş hatin kirin.
Atolyeya Pançê
Di heman demê de, ji bo ku keda jinan xuya bibe û piştgiriya pêvajoyên hilberînê were kirin, bi hevkariya Şaredariya Bajarê Mezin a Amedê li Taxa Kûçeyê ji bo jinan atolyeyeke pançê hate organîzekirin. Jinên beşdar bi bikaranîna afirînerî û xeyalên xwe nexşên pançê çêkirin. Her wiha di atolyeyê de li ser têkiliya jinan a bi ked, hilberîn û xwezayê re hat sekinandin, nêrîn hatin parvekirin da ku hevgirtina jinan xurtir bibe.
Gerînendetiya Polîtîkayên Jinan bi rêya atolye û kursên wiha, armanca dike ku wekheviya zayendî û bihêzkirina aborî û civakî ya jinan bidomîne. Hat ragihandin ku xebatên bi vî rengî dê di dema pêş de jî berdewam bikin.
