Amed – Şaredariya Erxeniyê di navbera 7 û 10ê Gulanê de 2yemîn Rojên Pirtûkan li dar dixe. Hevşaredar Erxeniyê Bîrsen Azak Bayar destnîşan kir ku bi armanca avakirina pêşerojek û civakeke demokratîk rojên pirtûkan li dar dixin û banga tev li bûnê kir.
Di pêşengtiya Şaredariya Erxeniyê de di navbera 7 û 10ê Gulanê de bi hevkariya Yekitiya Weşangerên Kurd (YEWKURD) û Şaxa Egîtîm Sen a Hejmara 3yemîn a Amedê li Park Ormanê ya Taxa Yenîşehîrê ya navçeya Erxeniyê 2yemîn Rojên Pirtûkan a Şaredariya Erxeniyê dê bê lidarxistin. Rojên pirtûkan bi armanca parastina çand, zimanê dayikê û têkoşîna li dijî polîtîkayên asîmîlasyonê tê lidarxistin. Di pêşengeha ku zêdetirî 40 weşanxane û 61 nivîskar dê tev li bin de gelek panel, gotûbêj û aktîvîteyên cuda dê bên lidarxistin.
Di nav mêvanên bernameyê de kesayetên wekî Kemal Varol, Sebahat Tuncel, Metîn Aktaş û Gultan Kişanak hene. Her wiha di çarçoveya bernameya sê rojan de, dê 23 panel û gotûbêj ji bo ciwan û xwendevanan werin lidarxistin. Di standan de dê ji her ziman û nasnameyê berhem, bi taybetî jî berhemên bi zimanê Kurdî, derkevin pêş. Hevşaredara Erxaniyê Bîrsen Azak Bayar, têkildarî amadekariyên rojên pirtûkan û girîngiya xwendinê ji ajansa me re axivî.
‘Bersivek li dijî polîtîkayên şerê taybet e’
Hevşaredara Erxeniyê Bîrsen Azak Bayar di destpêka axaftina xwe de bal kişand ser polîtîkayên asîmîlasyonê. Bîrsen Azak Bayar destnîşan kir ku ev rojên pirtûkan wekî helwestekê ye û got: “Armanca me ya sereke ew e ku em li dijî polîtîkayên şerê taybet, ên ku bi taybetî li ser ciwan, keç û xortên me tên meşandin, bisekinin. Her ku ciwanên me ji dîrok û nasnameya xwe dûr dikevin, ew qas zêdetir dikevin nav pençên vê pergala qirêj. Ji ber vê sedemê, me wekî rêveberiya şaredariyê, pêwîst dît ku em Rojên Pirtûkan ên Duyemîn li dar bixin.”
‘Dîrok di paşerojê de, paşeroj jî di îro de veşartî ye’
Bîrsen Azak Bayar di berdewamiya axaftina xwe de girîngiya xwendinê û avakirina civakeke demokratîk bi bîr xist û wiha pê de çû: “Çiqas ku ciwanên me pirtûkan bixwînin û xwe nas bikin, ew ê ew qas baştir pêşeroj û dîroka xwe fêm bikin. Wekî ku tê zanîn, armanca me ya bingehîn avakirina pêşerojeke û civakeke demokratîk e. Heke ciwan nexwînin, nenivîsin û dîroka xwe fêm nekin, avakirina civakeke demokratîk nabe armanceke pêkan. Ev pergal tenê bi zanebûna pêşeroja xwe, bi xwendinê û bi nasîna dîrok û zimanê xwe tê avakirin.”
‘Rêveberiyên herêmî berpirsiyar in’
Bîrsen Azak Bayar destnîşan kir ku rêveberiyên herêmî di warê parastina zimanê dayikê de xwedî berpirsiyariyên mezin in û wiha domand: “Ziman çiqas dewlemend be, avakirina jiyanê jî ew qas dewlemend e. Her ku dayikek bi zimanê xwe bi zarokê xwe re biaxive û zarok bi zimanê dayikê bixwîne û fêm bike, dê pêşeroja wî zarokî ew qas ronîtir bibe. Pêwîst e em tenê bi axaftinê sînordar nemînin; divê ciwanên me bi xwendinê xwe ava bikin.”
Banga tevlibûnê
Hevserok Birsen Azak Bayar di dawiya axaftina xwe de, bang li hemû gelê Erxaniyê û derdorê kir û got: “ Rojên Pirtukan ku ji 7ê Gulanê heta 10ê Gulanê berdewam bike bila gelê me berê xwe bidin qada Park Ormanê ya Yenîşehîrê û piştgiriyê bidin vê xebata watedar.”
