ANKA-DER, Navenda Çanda Anatoliyayê û METU Kurdî, Şeva Yelda bi bernameyeke pîroz kir. Bi sedan kes tevlî bernameyê bûn û bi xwendina helbestan û stranan pîrozbahî hat lidarxistin.
Komeleya Ziman, Çand û Hunerê ya Ankayê (ANKA -DER) Navenda Çand, Huner û Wêjeyê ya Anatoliyayê û Komeleya Lêkolînên Kurdî ya Zanîngeha ODTU (METU Kurdî), Şeva Yelda li Navenda Çandê ya Nergîsê ya li navçeya Çankaya ya Enqereyê bi bernameyeke pîroz kir. Şeva Yelda ku ji bo gelên Rojhilata Navîn weke ji taritiyê derketina ronahiyê ye di dawiya salê de tê pîrozkirin. Bi sedan kes beşdarî bernameyê bûn.
Endamê METU Kurdî Agîd Yildiz di bernameyê de axivî qala dîrok û wateya Şeva Yelda kir û ev tişt anî ziman: “Şeva Yelda yek jî cejna kurdan e. Em jî li dijî polîtikayên şerê taybet û pişaftinê têkoşîna xwe didomînin û van bernameyan li dar dixînin. Bê ziman jiyan nabe.”
Pîrozbahiya Şeva Yelda
Piştre jî ji aliyê xwendekarên zanîngehê ve helbest hatin xwendin. Çîrokbêj Ayhan Erkmen jî li ser dikê çîrokên xwe pêşkeşî temaşevanan kir. Koma Navenda Çanda Anatoliyayê jî stran gotin. Beşdervanan jî li ber çîrok, stran û helbestên tên gotin şeveke xweş derbas kirin.
Bername bi coşeke mezin bi dawî bû.
