Hevserokê Giştî yê DBPê Keskîn Bayindir di bîranîna Roboskiyê de got ku lênûska Komkujiya Roboskiyê nehatiye girtin û nayê girtin.
Li gundê Roboskiyê yê navçeya Qilebanê ya Şirnexê bi tevilbûna Hevseroka Giştî yên DEM Partî, DBP, endam û rêbeverên ÎHDê, Yekitiye Baroyên Tirkiyeyê, KESKê, ESPê, EMEPê, malbatên Roboskiyê û gelek welatiyan 34 welatiyên ku di 28ê Kanûna 2011an de bi balafirên şer ên artêşa Tirk hatibûn kuştin hatin bîranîn.
Piştî rêzgirtina ji bo kesên komkujiyê de jiyana xwe ji dest dane, axaftin hatin kirin. Hevseroka DEM Partiyê Tulay Hatînogullari diyar kir ku wan Roboskî ji bîr nekiriye, nadin jibîrkirin û wiha axivî: “Vaye 14 sal in em dipirsin, îro carek din em dipirsin kê biryara vê komkujiyê da, divê were eşkerekirin. Li Tirkiyeyê 2 hiqûq hene, yek ji bo Kurdan yek ji bo Tirkan. Bi awayekî cuda nêzî gelê Kurd dibin. Dema mijar dibe Kurd çavên xwe û guhên xwe digirin.”
Tulay Hatîmogullari derbarê Pêvajoya Aştî û Civaka Demokratîk de jî diyar kir ku tişta dikeve ser milê wan û axaftina xwe wiha berdewam kir: “Vaye 50 sal in li vî welatî xwîn dirije. Ji bo ev xwîn neyê rijandin tişta dikeve ser milê me em dikin. Em êdî dixwazin aştî were. Divê dewlet lêborînekî ji gelê Roboskiyê bixwaze û kujeran derxe holê. Em dibêjin ku sazkirina aştiyê di vê axê re derbas dibe.”
Hevserokê Giştî yê DBPê Keskîn Bayindir jî da zanîn ku dewlet dixwaze gelê Kurd dîroka komkujiyên wan ji bîr bike lê tu dem nayê jibîrkirin û wiha axivî: “Deftera Roboskiyê nehatiye girtin û nayê girtin. Xwestin gelê me her tim bi komkujiyan were bîranîn. Ji Dêrsimê heya Roboskiyê gelek êş hatin kişandin. Îro pêvajoyek heye lê ev nayê wê wateyê ku em ê dîroka xwe ji bîr bikin. Ger aştiyek bi rûmet ê pêk were divê edaleta Roboskiyê pêk were. Heya edalet neyê Roboskiyê Aştî pêk nayê. Dayîkên me Roboskiyê ji bîr nakin. Em ê jî heya dawiyê li pey doza Roboskiyê bin. Em duh jî li vir bûn, îro jî, sibe jî em ê li vir bin.”
Bîranîn bi danîna qerenfîlan a li ser gorên kesên hatine qetilkirin bi dawî bû.
