Temsîlkaranê sazgehanê demokratîk ê Şirnexî dîyar kerd ke azadîya Rayberê Şarê Kurdî Abdullah Ocaalanî azadîya komelî û cinîyan a û vengda heme beşanê komelî ke beşdarê mîtîngê “Hêvî û Azadîye” bibê.
Platformê Sazgehanê Demokratîk do 4ê çele de seba azadîya fîzîkî ya Rayberê Şarê Kurdî Abdullah Ocalanî Qadê Îstasyonî yê Amedî de mîtîngê “Hêvî û Azadîye” organîze bikero. Xeylê şaristananê Kurdîtan û Tirkîya de seba beşdarîya mîtîngê xebat û vengdayîşî yenê kerdene. Rayber û endamê sazgehanê komelanê demokratîk ê Şirnexî zî dîyar kerd ke no mîtîng seba averşîyayîşê prosesê Aştî û Komelê Demokratîkî xeylê muhîm o, manadar o û vengda heme beşanê komelî yê Botanî ke bi hewayêko xurt beşdarê mîtîngî bibê.
Hemserekê TUHAD-Der’î yê Botanî Aydin Denîzî bale ant vengdayîşê Rayberê Şarê Kurdî Abdulllah Ocalan ê 27ê sibate ser o û vat: “Birêz Abdullah Ocalan seba Tirkîya û Rojhelatê Mîyanên de aştîyêka domdare bêra ca 27ê sibate de vengdayîşêk kerd. Bi serran o şarê kurd, şarê Tirkîya û şarê Rojhelatê Mîyanênî seba cuyêka aram paweyê prosesêko winasîne bîyê. Nika hetê Rayber Apo ra prosesêk ame destpêkerdene. Têgêrayîşê Azadîye ra gamê muhîmî ameyê eştene. Ewro ra pey dewleta tirkan ganî gaman bierzaç.”
Azadîya Ocalanî do tesîrêko gird averşîyayîşê prosesî ser o bikero
Aydin Denîzî da zanayene ke Rayberê Şarê Kurdî Abdullah Ocalan şertanê tecrîdî e barêko xeylê giran girewto xo ser, sewbîna seba ke proses demêko kilm de bireso encamêk ganî Abdullah Ocalan bireso azadîya xo ya fîzîkî û wina domna: “Mîtîngê 4ê çeleyî seba heqê hêvî û azadîya Rayberê Şarê Kurdî Abdullah Ocalanî seba şarê kurd û şarê Tirkîya xeylê muhîm o. Manayê nê mîtîngî o yo ke ma vanê no yo ma wayîrê prosesî vejîyenê. Ma vînenê ke Rêzdar Ocalan şertanê giran de senî eşkenp prosesî aver bero û senî Tirkîya û Rojhelatê Mîyanênî ser o tesîr keno. Eke Rêzdar ocalan bi hewayêko fîzîkî azad bibo eşkeno xeylê çîyanê bînan bikero.”
‘Ma vendganê şarê Botanî ke beşdarê mîtîngî bibê’
Aydin Denîzî seba mîtîngê 4ê çeleyî nê vengdayîşî kerd: “Ma wayîrê Rayberêko winasîn ê ke eşkeno komelî rayra bero û fikrê ey tesîrê xo heme dinay ser o bikero. Nê semedî ra ma wazenê her welatijêkê ma seba heqê hêvî yê Birêz Ocalanî bêro caardene, bi hewayêko xurt beşdarê mîtîngî bibo.”
‘Heqê ziwan û kultur ê şarê kurdî û azadîya Ocalanî girêdayeyê yewbînan ê’
Rayberê Sazgehê Ziwan, Kultur û Hunerî yê Birca Belekî Cahît Akilî da zanayene ke heqê şarê kurd yê sey ziwan, kultur, nasname azadîya Rayberê Şarê Kurdî Abdullah Ocalanî reyde girêdaye yê û vat: “Nêzdîyê serrêk o prosesê Aştî û Komelê Demokratîkî ameyo destpêkerdene û Rayberê Şarê Kurdî Abdullah Ocalan mîmarê nê projeyî yo. Sey şarê kurd bi serran o ma têkoşînê ziwanê Kurdkî danê, ma zanê ke heqê şarê kurd ê nasname, kultur û ziwanî heme yewbînan ra girêdaye yê. Eynê wextî de nê heqî heqê hêvî û azadîya rêzdar Ocalanî reyde girêdaye yê. No mîtîng seba azadîya Rayber Ocalan û şarê kurdî muhîm o. Ma vengdanê heme şarê xo ke beşdarê mîtîngî bibê.”
‘Azadîya Ocalanî azadîya cinîyan a, azadîya cinîyan azadîya komelî ya’
Hemsereka DEM Partî ya Şirnexî Taybet Bîlgî da zanayene ke cinî bi felsefeyê Abdullah Ocalanî azad benê û wina vat: “Kesayetê Rayber Apo de do do heme komel, heme şar û heme ziwanî azad bibê. Manayê mîtîngî seba ma hemînan no yo. Nê prosesî de no mîtîng xeylê manadar o. Seba ke ewro cinî felsefeyê Rayber Apo azad benê, demo ke Rayber Apo azad bibo, no do hêz bido azadbîyayîşê cinîyan û ci do xo reyde komelî azad bikerê. Ma vengdanê heme cinî û ciwanan ke beşdarê mîtîngî azadîya Rayber Apoyî bibê.”
‘Fikranê Abdulla Ocalanî rê wayîrvejîyayîş wezîfeyê her dîndarêkî yo’
Endamê Însîyatîfê Yewîya Demokratîk Mela Kasim Yîgîtî zî da zanayene ke fikrê Abdullah Ocalanî îslamîyeto rast temsîl kenê û bi nê vatişan vengda bawermendan ke beşdarê mîtîngî bibê: “Birêz Ocalan bi fikranê xo yê aştîyane awêk adirê mabênê beşanê cîya ê komelî rê keno. Awankerdişê na aştî de barêko giran keweno milê komelî, bi taybetî zî komelo bawermend. Vengdayîşê Rêzdar Ocalanî ê seba aştî zî vengdayîşê Îslamîyetê rastênî yo. Seba ke vindertişê şerî û awankerdişê aştî milanê îslamê rastênî ser o yo. Çîyo ke nê welatî de aştî û aramî awan bikero fikrê Rêzdar Ocalanî yê. Seba ke Tirkîya û Rojhelatê Mîyanênî de aramî û aştî biba, ganî ma wayîrê mîtîngê 4ê çeleyî vejîyê. Ma vengdanê heme komelî
Bşi taybetî komelo bawermend ke verê xo bidê Qadê Îstasyonî.”
