Amed – Meclisa Dayikên Aştiyê li dijî êrîşên ser taxên Şêxmeqsud û Eşrefiyê yên Helebê dê bimeşin Enqereyê. Dayikên Aştiyê derheqê çûna Enqerê de deklerasyon eşkere kirin û êrîşên Helebê şermezar kirin.
Meclisa Dayikên Aştiyê li dijî êrîşên li ser taxên Şêxmeqsud û Eşrefiye yên Helebê dê sibê ji Serhed, Botan, Amed, Edene, Mêrsîn, Îzmîr û Stenbolê ber bi Enqereyê ve bimeşin. Dayikên Aştiyê yên Amedê derbarê meşê de deklerasyonek eşkere kirin. Endamên Dayikên Aştiyê yên Amedê tevlî deklerasyonê bûn. Dayikên Aştiyê bertek nîşanî êrişan dan û êriş şermezar kirin. Dayikên Aştiyê dê di 12ê Çileyê de li Parka Koşuyolu ya Navçeya Rezana Amedê dê wesayitan siwar bibin û ji bo çûna Enqereyê dê bikevin rê. Endama Dayikên Aştiyê Murvet Demîr bernama çûna Enqerê eşkere kir.
Tirkiye li şûna Kurdan piştgiriya dijminê xwe dike
Endamê Meclisa Dayikên Aştiyê Murvet Demîr diyar kir ku ji bo sekinandina şer çi destê wan bê dê bikin û wiha got: “Em ji bo êrîşên li ser Rojavayê em ê biçin li Enqereyê. Ji bo sekinandina şer çi destê me bê em Dayikê Aştiyê em ê xwe bidine ber şer. Yên ku şer diderxînin di malê xwe de rûniştine zarokên me, şervanên me têne qetil kirin. Tu mafê wan tuneye şer derxin. Xwîşk û biratî lû ku derê ma. Du leşkerên we li Iraqê şewitandin. Li hefteyekê berê li Yalovayê 8 polîsên we hatin kuştin. Herin heyfa wan bistînin. Hûn dîsa piştgiriyê didine DAÎŞê, hûn dibêjin şer berdewam bikin. Hakan Fîdan Kurd e qet ji Kurdayetiya xwe fêm nake. Ev xwîna Kurdayetiyê li ku çû. Canê te de qet demarek jî nema mîrato. Tu çima piştgiriya Kurda nakî, tu çima heyfa leşkerê xwe ranakî.”
‘Mijar Kurd bin desthilat sê meymûnan dilîze’
Murvet Demîr desthilatdar şermezar kir û anî ziman ku Dayîkên Aştiyê ne tenê li Amedê dê ji bajarên din jî bir ê bikevin û ev tişt gotin: “Em ê di saet 14.00an de li Amedê derkevin û em ê biçin Enqereyê. Em bang li dayikên polîsa dikin, em tu car şer naxwazin. Me wek zarokê xwe singê xwe daye ber şer û em li pêşiya ser sekinîne. Em dibêjin aşitî, aşitî, aşitî. Hûn kerr bûne. Dema mijar dibe gelê Kurd hûn sê meymûna dileyzin. Em naxwazin şer çê be Rojava, Rojhilat, Bakur, Başur, Tirkiye ferq nake em şer naxwazin. Em pêşiya neheqiyêne, em pêşiya faşîzmê ne; em rastiyê dixwazin, em mirovahiyê dixwazin, mafê xwe dixwazin. Mafê me bidin me.”
