Amerîkayê bang li welatiyên xwe yên li Îranê kir û ji wan xwest ku demildest ji Îranê derkevin. Balyozxaneya Amerîkayê got ku ji ber zêdebûna xwepêşandanan xetereya li ser jiyanê zêdetir bûye.
Balyozxaneya sanal a Amerîkayê ya Îranê ji bo xetereya li ser jiyanê ya li Îranê hişyariyeke lezgîn parve kir û ji walatiyên amerîkî xwest ku demildest ji Îranê derkevin. Di daxuyaniyê de hat xwestin ku welatiyên amerîkî bernameya xwe ya derketina ji Îranê çêkin û li benda alîkariyê rêveberiya Amerîkayên nemînin.
Fikar û xetereyên li ser jiyanê zêdetir dibin
Balyozxaneyê di daxuyaniyê de destnîşan kir ku li Îranê her roj xwepêşandan zêde dibin û ev jî xetereya li ser jiyanê zêdetir dike. Di daxuyaniyê de ji bo welatiyên Amerîkî ku ji Îranê dernekevin jî dixwaze ku “di mala xwe de an jî di avahiyeke bi ewle de bimînin.”
Siyaseta mudaxileya çekdarî jî li ser maseyê ye
Derbarê helwesta Amerîkayê ya li ser Îranê de Berdevka Qesra Spî Karoline Leavitt daxuyanî da. Karoline Leavitt di daxuyaniyê de diyar kir ku siyaseta Serokê Amerîkayê Donald Trump di destpêkê de siyaseta dîplomasiyê ye lê heke ev bê encam bimîne “siyaseta mudaxileya çekdarî” jî her tim li ser maseyê heye.
Çi bûbû?
Li Îranê ji ber bênirxbûna pereyê Îranê û bêîstîkrariya aboriyê di roja 28ê Kanûna 2025an de dikandarên Çarşiya Mezin a Tehranê dest bi çalekiyên xwepêşandanê kirin. Di demeke kin de ev çalekiyên xwepêşandanê li seranserî Îran û Rojhilatê Kurdistanê belav bû. Roja 9ê Çileya 2026an li seranserê Îranê înternet ji aliyê rejîmê ve hat qutkirin.
Derbarê kuştî, birîndar û girtiyan de her roj raporên girantir hatin parvekirin. Herî dawî saziyên mafên mirovan, platformên medya dijîtal encama 16 rojên xwepaşandanên li Îranê bi raporên xwe eşkere kirin. Di raporên hatin parvekirin de tê dîyarkirin ku 9 kes zarok bi kêmanî 646 kes hatine kuştin û ji 10 hezarî zêdetir jî xwepêşander hatine girtin.
