Parlamenterê DEM Partî yê Rihayê Omer Ocalan ku li meclisê axivî bal kişand ser êrişên çeteyan ên li ser taxên Şêxmeqsûd û Eşrefiyê û got: “Êdî Kurd ji çar aliyan bi yek dengî tevdigerin. Divê desthilat êdî dev jî van polîtikayan berde. Ew dê zerarê bide hemû kesan.”
Parlamenterên Partiya Wekhevî û Demokrasiyê ya Gelan (DEM Partî) li meclîsa Tirkiyeyê bertek nîşanî êrişên çeteyên HTŞ û SMOyê yên li ser taxên Şêxmeqsûd û Eşrefiyê yên Helebê dan. Di serî de parlamenterê Stenbolê yê DEM Partî Celal Firat axivî û bal kişand ser komkujiyên li ser elewiyan pêkhatibû got ku komên weke DAIŞê li dijî netewe û baweriyên cuda komkujiyan pêk tînê.
Parlamentera Rihayê ya DEM Partiyê Dîlan Kunt Ayan jî destnîşan kir ku jina berxweder a taxa Şêxmeqsûd ku piştî jiyana xwe ji dest da ji aliyê çeteyan ve li ser avahiyeke ve hat avetin û ev tişt gotin: “Em wê berxwedanê bi rêzdarî silav dikin. Hişmendiya DAIŞê ku li dijî kurdan qirkirinê dide meşandin teqez wê ji aliyê têkoşerên hevî û rûmetê ve bên tekbirin. Yên ku ew hoviîtî pêkanîn û kesên piştgirî dan vê hovîtiyê di dîrokê de kesên herî rûreşin. Em li rex berxwederên Helebê ku tax û rûmeta xwe diparêzin. Divê komkujiyên li dijî kurdan demildest bên rawestandin.”
‘Niha Heleb dişewite lê sibê dê ku der bişewite ne diyar e’
Parlamenterê DEM Partî yê Rihayê Omer Ocalan jî bi lêv kir ku têketina her du taxan girtiye û wiha got: “Lîstikên pir xirab tên lîstin. HTŞ û DAIŞ dixwazin li Helebê li dijî kurdan komkujiyeke mezin pêk bînin. Kurd li dijî vê bi hers in. Kurd li çar aliyan bi hev re tevdigerin. Divê desthilat dev jî van polîtikayan berde. Ew ji bo hemû aliyan xetere ye. Niha Heleb dişewite lê sibê dê ku der bişewite ne diyar e. Divê ew lîstikên xeter demildest rawestin. Aştiya mezin a kurd û tirk li vî welatî pêk were.”
‘Divê êriş rawestin û binçavkirin û girtin bi dawî bibin’
Parlamenterê Wanê yê DEM Partî Zulkuf Uçar jî anî ziman ku bi êrişan statuya gelê kurd hedef tê girtin û got: “Gelê kurd li dijî êrişan li qadan in. Lê ji ber protestoyên rewa welatî tên binçavkirin. Divê êriş rawestin û binçavkirin û girtin bi dawî bibin. Xwedî derketina Rojava rûmet e. Em berxwedana gelê xwe yê li Rojava silav dikin.”
Parlamenterê Colemêrgê yê DEM Partî Onur Duşunmez jî destnîşan kir ku êrişa li dijî jin, zarok û welatiyên sivîl sûcên li dijî şer e û got ku hemû peymanên mafê mirovan hatine binpêkirin.
‘Dema kurd bin wateya mizgeftê jî ji bo we tune ye’
Parlamenterê Mersînê yê DEM Partî Alî Bozan jî bertek nîşanî êrişan da û got: “Li Xazeyê dema mizgeft hat bombekirin li meclisê hûn ketibûn pêşbirka wijdan lê dema Helebê mizgeft hat bombekirin bê deng bûn. Dema yên rastî êrişan tên kurd bin wateya mizgefte jî ji bo we tune ye. Wezîrê Parastinê piştgiriya komkujiya Halebê kir. Em komkujiya li dijî gelê Kurd li Helebê û kesên piştgirî dane ji bîr nakin.”
Parlamentera Mersînê ya DEM Partî Perîhan Koca jî bal kişand ser têkiliya Tirkiyeyê ya bi çeteyên êrişkar re û bertek nîşanî êrişan da û xwest êriş rawestin.
