Amed – Girtiyê nexweşê giran Mehmet Elçe tevî rapora ATKê ya “Nikare di girtîgehê de bimîne” jî nayê berdan. Kurê Mehmet Elçe, Huseyîn Elçe bal kişand ser rewşa dawî ya bavê xwe û got: “Nexweşiyên wî her ku diçe zêdetir dibin. Niha êdî nikare bimeşe û tenê bi alîkariya kursiya biteker bi rê ve diçe. Divê demildest were berdan.”
Di 26ê Tebaxa 2016an de li navçeya Cizîrê ya Şirnexê li Midûriyeta Polîsan a Navçeyê teqînek pêk hat. Li gorî agahiyên ku Walîtiya Şirnexê dabûn di teqînê de 12 polîsan jiyana xwe dest dabûn û 78 kes jî birîndar bûbûn. Piştî 5 roj bi ser bûyerê re derbas bûn Mehmet Elçe û 4 hevalên wî dema li Silopiyayê ji kar vedigerin hatin binçavkirin û girtin. Mehmet Elçe di çarçoveya doza ku jê dihate darizandin de 12 caran cezayê muebeda girankirî û 2 hezar û 500 sal cezayê girtîgehê lê hat birîn. Mehmet Elçe yê ku niha 64 salî ye piştî hate girtin bi nexweşiya penceşêra mîdeyî ket, di sala 2022yan de li Dîlokê ji aliyê Nexweşxaneya Perwerde û Lêkolînê ya Dr. Ersin Aslan ve rapora “Nikare di girtîgehê de bimîne” jê re hat dayîn. Mehmet Elçeyê niha di Girtîgeha Tîpa Ryê ya Xarpêtê tê ragirtin. ATKê di rapora ku derbarê Mehmet Elçe de amade kiriye wiha dibêje: “Bi tena serê xwe nikare pêdîviyên xwe bi cih bîne û nikare di girtîgehê de bimîne.” Li gorî vê biryarê divê Mehmet Elçe hatibûya berdan lê Dozgeriya Girtîgehê ev biryar red kir. Li ser vê yekê Mehmet Elçe ji bo ku rapora ATKê were bicihanîn serî li Dadgeha Înfazê ya Girtîgehê da.
Kurê Mehmet Elçe, Huseyîn Elçe derbarê rewşa dawî ya bavê xwe de ji ajansa me re axivî.
‘Em êdî nizanin ka ji bo kîjan nexweşiyê dermanan peyda bikin’
Huseyîn Elçe diyar kir ku rewşa bavê wî ya tenduristiyê pir giran e û got: “Di sala 2016an de, dema ku ji karê xwe vedigeriya, leşkerên dewleta Tirk ew binçav kirin. Ev 10 sal in ku ew di girtîgehê de ye. Niha rewşa wî ya tenduristiyê gelekî xirab e û çend nexweşiyên giran pê re peyda bûne. Îro ji ber ku nexweşiyên wî pir zêde ne, em êdî nizanin ka ji bo kîjan nexweşiyê dermanan peyda bikin an jî tedawiya wî bidin destpêkirin. Beriya deh rojan rapora wî ya tenduristiyê hat, lê belê dozger daxwaza tehliyeyê red kir. Her çiqas ku ATKê di rapora xwe de diyar kiribe ku ‘Ev kes nikare di bin van şert û mercên girtîgehê de jiyana xwe berdewam bike’, jî dozger daxwaz red kir û tu bersiveke erênî neda.”
‘Tenê ji ber gumanan hatin girtin’
Huseyîn Elçe destnîşan kir ku bavê wî bê suc bi salane di girtîgehê de ye û wiha pêde çû: “Bi tu awayî sûcekî bavê min tune ye. Li wir valahiyeke hiqûqî an jî îdarî hebû û ji ber wê valahiyê hinek kes kirin qurban û ew li wir girtin. Îro dadgehên dewleta Tirk tenê çi kirin? Sûcdar kirin. Di vê dozê de pênc kes hatin girtin tevî bavê min, mamê min û sê hevalên wan ên din jî hatin girtin. Her çar kesên din jî mirovên xwedî mal, xwedî zarok û karker bûn. Em nikarin derheqê ji wan tu kesî de bibêjin ku sûc kirine. Ji bo her pênc kesan jî em dikarin vê yekê bibêjin, tenê ji ber guman an jî tawanbariyeke bêbingeh hatine girtin. Ev her pênc kes jî bêguneh bûn, lê hatin girtin û niha di girtîgehê de ne zarokên wan li derve perîşan bûne.”
‘Tenê bi alîkariya kursiya biteker bi rê ve diçe’
Huseyîn Elçe destnîşan kir ku li gorî rapora dawî ya derbarê bavê wî de hate amadekirin divê ew demildest were berdan û wiha axivî: “Hate diyarkirin ku ji ber nexweşiyên wî êdî nikare di girtîgehê de bimîne. Di sala 2021an de ji ber nexweşiya penceşêrê mîdeyê wî bi emeliyatê jê kirine. Tedaviya kemoterapiye dîtîye. Weke şekir û tansiyona zêde nexweşiyên wî yên kronîk hene. Demareke serê wî xetimiye û milê wî yê çepê felç bûye ji ber vê yekê nikare karên xwe yên rojane bike. Teşhîsa KOAHê hate dayîn. Nexweşiyên wî her ku diçe zêdetir dibin. Niha êdî nikare bimeşe û tenê bi alîkariya kursiya biteker bi rê ve diçe. Ew jî tenê bi alîkariya hevalên xwe yên girtîgehê dikare jiyana xwe bidomîne.”
‘Ew nikare di girtîgehê de bimîne’
Di dawiya axaftina xwe de Huseyîn Elçe bang li rayedaran kir û wiha got: “Temenê bavê min mezin e. Êdî nikare di girtîgehê de bijî. Wekî ku tê zanîn di jiyana girtîgehê de, heke mirovek saxlem be û hemû karên wî bi rêkûpêk bin jî jiyan lê zehmet e. Bi ser de jî bi dehan nexweşiyên wî yên giran hene. Ew nikare jiyana xwe di girtîgehê de berdewam bike. Daxwaza me ew e ku bêyî derengketin, were berdan daku temenê xwe yê mayî di nav zarokên xwe de û di şert û mercên baş de derbas bike.”
