Di cinîyî bi nameyê Gulale Mehmudî Azer û Negîn Kadimî hêrişê hêzanê Îranî de ameyê qetilkerdene, Sogol Haşîmî jî birîndar bîye. Ame dîyarkerdene ke dewlete seba ke cenazeya Gulale Mahmudî Azer bida keyeyê aye ra 1 mîlyar tumen girewto.
Goreyê raporanî ke hetê medyaya heqanê merdiman ra ameyê weşanayene, di cinîyê bi nameyê Gulale Mehmudî Azer û Negîn Kadimî hêrişê rasterast ê hêzanê Îranî de cuya xo vîndî kerda, cinîyêka bîn a bi nameyê Sogol Haşimî zî birîndar bîya.
Goreyê agahîyanê ke ameyê vilakerdene Gulale Mahmudî Azer a kurd ke şaristanê Mahabad ra ya, 8ê çeleyê 2025î de şewa Pancşeme demê çalakîyanê Tahranî de bi hêrişo rasterast ê hêzanê ewleyî cuya xo vîndî kerda.
Goreyê raporî sazgehê dewlete seba ke cenaza bidê keyeyê ci, waştişê 1 mîlyar tumenî kerdo. Ame dîyarkerdene ke keyeyê Gulale Mahmudî Azer binê tedayêka giran û şertanê bi temamî merdimîye ra durî de bêçare mendê ke waştişê dewleta Îranî qebul bikerê.
Negîn Kadîmî ya 28 serra demê çalakîyanê şaristanê Şehsava de bi hêrişê gule cuya xo vîndî kerda. Goreyê raporan na welatija çalakîker 10ê çeleyî de encamê hêrişê rasterast ê hêzaê ewleyî de birîndar bîya û destanê pîyê xo de cuya xo vîndî kerda.
Raporanî de ke ameyê weşanayene, ame dîyarkerdene ke welatija şaristanê Sarî ra Sogol Haşimî demê çalakîyan de hêrişê hêzanê ewleyî de birîndar bîya. Eynê wextî de ame dîyarkerdene ke pîyê aye Emîr Haşimî hetê hêzanê îstîxbaratê Muhafizanê Şorişî ra ameyo destbendkerdene û ey berdo cayo ke dîyar nîyo. Derheqê tarîxo ke na welatije birîndar bîya û rewşa aye ya weşîye de tu agahî nêameyê girewtene.
