Hunermendên Kurd Cewat Merwanî û Berbang Hîlat bang li gelê kurd kirin ku yekîtiya xwe xurt bikin û gotin: “Divê hemû Kurd rabin ser piyan. Em ê bi hevre vê zilm û zordariyê li ser axa xwe paqij bikin. Serkeftin teqez ya me ye.”
Bertek û nerazîbûna li dijî êrîşên li ser gelê Kurd zêde dibe. Piştî HTŞ, DAIŞ û komên girêdayî Tirkiyeyê êrîşên xwe li ser taxên Kurdan Şêxmeqsûd, Eşrefiyê û Rojavayê Sûriyeyê zêre kirin, bertek û nerazibûn jî zêde bûn. Gelê Kurd ji 19ê çile de li gelek bajarên Kurdistanê û Ewropayê çalakiyan li dar dixin û bertekên xwe yên li dijî êrîşên li ser Rojava tînin ziman. Hunermendên Kurd jî bertekên xwe anîn ziman û xwestin gelê Kurt bêtir yekîtiya xwe xurt bike.
Hunermend Cevat Merwanî diyar kir ku li ser kurdan careke din qirkirin tê ferz kirin û wiha got: “Ev ferman bi destê hêzên dagirker tê meşandin. Ji Îngîlîzan bigire heta Amrerîka, Îsraîl û dewletên ereban pêk tê. Di serî de dewleta Tirk dixwaze kurdan li ser vê axê tune bikin. Plan dikin ku careke din navê Kurdan li ser vê axê nemîne. Li dijî van êrîş û planan, şervanên kurd li her derê li ber xwe didin. Em bi vê berxwedan û wêrekiya we li her derê bang dikin. Em li her derê li dijî qirkirinê têbikoşin û bibin yek. Îro li se kurdan qirkirinê ferz dikin. Îro berê xwe dane Rojava, dê sibê berê xwe bidin başûr û roja din dê berê xwe bidin bakur. Dixwazin gelê Kurd ku bi hezaran sal in li ser vê axê dijî tune bikin. Projeya wan qirkirin e. Plana me jî berxwedan e. Heta niha kurdan 28 caran serî hildan. Tu carî kurdan li dijî zulm û zorê serî danexistiye. Hatine kuştin û xwîna wan rijiya ye, lê tu carî serî daneniye. Em ê careke din li ber xwe bidin û bi ser bikevin. Divê tu kes moralê xwe xera neke.”
Cewat Merwanî xwest guh nedin çapemeniya dewletê û li çapemeniya xwe guhdar bikin û wiha lê zêde kir: “Li gelê kurd û Kurdistanê guhdar bikin. Li çapemeniya xwe guhdar bikin û bawer bikin. Em ê di vê berxwedana xwe de bi ser bikevin. Em bang li gelê xwe, hemû heval û hogirên xwe dikin li dijî êrişên DAIŞ û HTŞê bibin yek. Werin em bi hevre vê DAIŞê ji Rojhilata Navîn paqij bikin. Yên piştgiriyê didin DAIŞê û vê komkujiyê li ser gelê kurd dimeşîne, dê sibê dora wan jî bê. Serkeftin ya me ye. Kurdistan yek e, nabe çar parçe. Em yekîtiya xwe bêtir xurt bikin. Em dijminê xwe bişkînin û xwe biparêzin. Hezar silav li şervan û gelê me yê ku axa xwe diparêze. Em bi were ne. Em ê bi hevre vê zilmê ji ser vê axê paqij bikin.”
Hunermend Berbang Hîlat jî diyar kir ku dirok bi komkujiyek nû ya li ser Kurdan xwe dubare dike û wiha got: “Ev komkujî bi destê dewleta Tirk, dewleta Şamê û hêzên navdewletî xwe dubare dike. Li Rojava 15 hezar ciwan şehîd bûn û 30 hezar ciwan birîndar bûn. Rojava ne tenê Rojava ye. Rojava nûnertiya hemû gelê Kurd dike. Îro jin, ciwan, kal û pîr hemû di bin gefên DAIŞê de ye. DAIŞ dixwaze Rojava têk bibe. Kurd bi hebûn û tunebûnê re rû bi rû ye. Banga min ji bo Hewler, Şengal, Amed, Mahabad û Bakurê Kurdistanê ye. Rabin ser xwe. Îro nasnameya gelê Kurd bi destê Tirkiyeyê tê tunekirin. Kurdistan rabe ser piyan. Em 60 milyon mirov in em bibin yek. Em ne bêxwedî ne. Em bi hêz in. Rojava ne bi tenê ye. Keç û xortên Kurdistanê axa xwe biparêzin. Em Kurdistanê bernedin.”
Berbang Hîlat da zanîn ku Rojava ne bi tenê ye û wiha got: “Divê em Rojava bernedin. Rojava têk biçe dê hemû Kurdistan têk biçe. Amed, Hewler û Silêmanî rabin ser piyan. Em bang li Barzanî jî dikin. Roj roja man û nemanê ye.”
