Badê ke Hemşaredarê Akdenizî Hoşyar Sariyildiz û Nuriye Aslan ameyî destbendkerdene şar verê şaredarîye de ame pêser.
Hemşaredaranê Akdenizî yê DEM Partî Hoşyar Sariyildiz û Nuriye Aslan û endamê meclîsî Ozgur Gaglar, Yakup Daniş, Himket Bakirhan û Neslîhane Oruç saetanê serê sibayî de sereştişê keyeyanê înan de ameyî destbendkerdene.
Polîsanê ke banê şaredarîye girewt binê ablûqa vat ”qeyûma ame cakerdene.” Derheqê dosyaya tehqîqatî de qerarê nimitişî ame girewtene û kesê ke ameyî destbendkerdene seba 24 saetan pêvînayîşê înan bi avûkatan ame astengkerdene.
Şaro ke mehleyanê cîya cîyayan ê Akdenizî de ame têhet destbendkerdiş û qeyûm bi rayraşîyayîşî protesto kerdî.
Hemsereka DEM Partî ya Mersinî Bedriye Kuş ard ziwan ke ê destur medê qeyûmî û veng şarê Mersinî ke wayîrê îradeyê xo bivejo.
Verê şaredarîye de bi slogana sey “Bijî berxwedana gelê Kurd” qeyûm yeno protestokerdene.
