Xizmên Windayan û rêveberên ÎHDa Êlihê vê hefteyê li aqûbeta Cuneyt Aydinlar ê ku di 20ê Sibata 1994an de li navçeya Bakirkoyê ya Stenbolê hatibû windakirin, pirsîn.
Xizmên Windayan û rêveberên Şaxa Komeleya Mafên Mirovan (ÎHD) a Êlihê di hefteya 723yemîn a çalakiya “Bila winda bên dîtin û kujer bên darizandin” li ber Bîrdariya Mafên Mirovan a li Cadeya Gulistanê li aqubeta Cuneyt Aydinlar pirsîn. Di çalakiyê de Rêveberên ÎHDê û Xizmên Windayan û gelek kes amade bûn û wêneyên kesên ku di binçavan de hatibûn windakirin hildan. Vê hefteyê li aqûbeta Cuneyt Aydinlar ê di destpêka salên 90î de ji Amedê ji bo xwendina zanîngehê çûbû Stenbolê û hatibû windakirin, pirsîn. Cuneyt Aydinlar xwendekarê Fakulteya Aborî ya Zanîngeha Stenbolê di pola 3yan de dixwend. Ew di 20ê Sibata 1994an de ji bo ku bi hevalekî xwe re bê gel hev çûye rawestgeha Omurê ya li navçeya Bakirkoyê û ji wê rojê ve tu agahî jê nehatiye girtin.
Daxuyaniya vê hefteyê ji aliyê rêveberê ÎHDa Êlihê Alî Karadogan ve hate xwendin.
‘Em ê di lêgerîna adalet û rastiyê de bi israr bin’
Alî Karadogan bi bîr xist ku Cuneyt Aydinlar di 20ê Sibata 1994an de hatiye girtin û heta 2ê Adara 1994an ew di binçavan de dimîne û wiha got: “Cuneyt Aydinlar di binçavan de bi îşkenceya giran re rû bi rû maye. Di 2yê Adarê 1994an de ji aliyê şeş polîsan ve ku gotibûn, ‘Tu amade yî ku bimrî? Tu diçî mirinê!’ hatiye revandin. Ji wê demê heta niha tu agahî jê nayê girtin. Dozgera Komarê li şûna ku bûyerê lêkolîn bike, senaryoya ku reviyaye ya polîsan esas girt û biryara girtinê derxistiye. Bi sedema hinceta demboriyê hewceyî vekirina dozê nehat dîtin. Mixabin, dewlet heta îro ne pergalek edaletê ya ku bikaribe rewşa kesên di binçavan de hatine windakirin zelal bike, nedaye avakirin. Kesên ku ji wan windayan berpirsiyarin divê bi sûcê li dijî mirovahiyê li ber dadgehê hesab bidin. Rayedar û berpirsiyar bêdeng man lê em ê bêdeng nemînin. Em ê di lêgerîna edalet û rastiyê de bi israr bin. Tişta ku dixwazin were windakirin, mirovahî ye. Ji ber vê yekê em ê her dem li rûmeta mirovahiyê xwedî derkevin.”
Daxuyanî bi deqeyek çalakiya rûniştinê bi dawî bû.
