Hevşaredara Wanê Neslîhan Şedal di civîna amadekariyên 8ê Adarê de axivî û bal kişand ser dirûşma “Jin Jiyan Azadî” û got: “Êdî her kes dizane ku azadî bi azadiya jinan ve girêdayî ye.”
Rêveberiya Polîtîkayên Jinan a Yekîtiya Şaredariyên Herêma Anatoliya Başûrê Rojhilat (GABB), Lîjneya Rêveberiyên Xwecîhî ya Demokratîk a DEM Partiyê û Lîjneya Jinan a Bajêr, di çarçoveya çalakiyên ku dê 8ê Adarê Roja Jinan a Cîhanê de werin lidarxistin de, li Navenda Çandê ya Bêrîvanê ya girêdayî Şaredariya Rêya Armûşê civînek li dar xist. Hevşaredarên jin ên navçeyan bajêr, aktîvîstên TJAyê û gelek jin beşdarî civînê bûn.
Civîn ewilî bi deqeyek rêzgirtinê dest pê kir. Piştre Hevşaredara Ebexê Hatîce Atabay destpêkê axivî û bal kişand ser giringiya 8ê Adarê.
Piştre Hevşaredara Wanê û Hevseroka GABBê Neslîhan Şedal a ku qeyûm tayînî şûna wê hatiye kirin axivî û diyar kir ku ji bo hişmendiyeke azad divê jin geşedanên dawiyê baş fêm bikin û li gorî wê xwe bi rêxsitin bikin. Neslîhan Şedal anî ziman ku di van rojan de erkeke mezin dikeve ser milên jinan û got: “Her çiqas ev dema em têde derbas dibin şerekî giran hebe jî berpirsyariyên mezin dikevine ser milên me jinan û rêveberiyên xwecihî. Em di rêveberiyên xwecihî de pergaleke azad û wekhev ji bo tevahî civakê ava dikin. Bi vê yekê wê pirsgirêkên civakê jî çareser bibin. Jinên ku di qada rêveberiyên xwecihî û di qada polîtikayên jinan de pêşengiyek baş û mîsyoneke baş pêk binin wê li hember vê pêvajoyê bersiveke xurt jî bê dayîn.”
‘Êrişî destkeftiyên jinan dikin’
Neslîhan Şedal behsa rewşa Rojavayê Kurdistanê jî kir û axaftina xwe wiha berdewam kir: “Di şexsê Rojava de bi hêzên navneteweyî şerekî qirêj hat meşandin. Me rûyê qirêj ê hişmendiya ku li çar aliyên cihanê xwe nîşan dide li Rojava dît. Li dijî vê hişmendiyê bi rêxistina jinan têkoşîneke bêhempa hate dayîn. Li Rojava bi pêşengiya jinan pergala azad û wekhev hatiye avakirin. Li her qadê destkeftî û îradeya jinan zêde bûye. Beriya meheke bi destê koalîsyona navneteweyî û Tirkiyeyê, çeteyên HTŞê êrişî destkeftiyên jinan kirin. Tiştên ku HTŞê kirin divê em baş bixwînin. Ev êriş li dijî hebûn û xwebûna me bûn. Li ku derê jin û destkeftiyên jinan hebin êrişî vê derê dikin.”
‘Li dijî zarokan jî pergaleke qirkirinê ava kirine’
Neslîhan Şedal bal kişand ser doza Epsteîn jî û wiha dawî li axaftina xwe anî: “Em dizanin ku di şeran de bi hezaran zarok tên windakirin û em rewşa wan nizanin. Di heman demê de di dema şer û pevçûnên li Rojava de jî gelek jin winda bûn. Lê êdî em dibînin ku pergalê ji bo xwe tiştek wisa ava kiriye ku ew jinên winda dibin, jinên rewşa wan ne diyar di belgeyên doza Epsteîn de eşkere dibin. Çawa li dijî jinan pergaleke qirkirinê ava kirine bi heman awayî li dijî zarokan jî pergaleke qirkirinê ava kirine. Di dosyeyên Epsteînê de derket holê ku di şexsê jin, zarok û civakê de êrişeke li dijî mirovahiyê pêk hatiye. Divê ji bo teşhîrkirina van polîtîkayên qirêj û êrişan em li qadan bin û em dengê xwe bilind bikin. Rêberê Gelê Kurd Abdullah Ocalan dibêje ku civak bê azadiya jinan azad nabe. Ji bo ku civak azad be û zarok rastî êrişan neyên, divê em pêşî xwe azad bikin, paşê jî civakê. Li her derê dirûşmeya ‘Jin jiyan azadî’ tê gotin, her kes dizane ku azadî bi azadiya jinan ve girêdayî ye. Em ê ji bo vê yekê têkoşîna xwe bidomînin.”
Piştî axaftinan civîn ji çapemeniyê re girtî berdewam kir.
