Şandeya Îmraliyê peyameke girîng a Rêberê Gelê Kurd Abdullah Ocalan a derbarê “Pêvajoya Aştî û Civaka Demokratîk” de parve kir. Ocalan di peyama xwe de balê dikişîne ser bingeha avakirina aştiyeke mayînde û destnîşan dike ku “ruhê yekbûna demokratîk” tenê bi sazbûna demokrasiya herêmî pêkan e.
Abdullah Ocalan têgeha “yekîtiyê” ji qalibên navendîparêz ên klasîk derdixe û bi perspektîfeke nû pênase dike. Li gorî wî, yekbûna welatekî bi sazûmanîbûna demokrasiya herêmî xurt dibe û destnîşan dike ku heke gundek an bajarek karibe xwe bi awayeke azad îfade bike û rêveberiya xwe ava bike, ev yek dibe bingeha herî xurt a yekîtiya demokratîk a Tirkiyeyê.
Peymanameya Ewropa û rastiya civakî
Di peyama Rêberê Gelê Kurd Ocalan de referansa li ser Peymannameya Ewropayê ya Xwerêveberiya Herêmî wekî xaleke stratejîk derdikeve pêş. Ocalan daxwaz dike ku ev peyman ne bi şêweyekî teng, lê bi guhertinek berfirehkirî ku li gorî rastiya civakî ya Tirkiyeyê hatî amadekirin, were qebûlkirin. Ev bang, ji bo nîqaşên li ser destûreke nû û demokratîk, bingeheke hiqûqî ava dike.
Mafê xwebirêvebirina gund û bajaran
Abdullah Ocalan di peyama bi Şandeya Îmraliyê ve ji raya giştî re ragihandiye de, bi taybetî li ser asta herî piçûk a birêvebirinê radiweste û wiha dibêje, “Mebesta min gundek an bajarek ku daribe xwe bir ê ve bibin ye” û bi vê yekê nîşan dide ku demokrasî divê di hucreyên herî piçûk ên civakê de şîn bibe. Li şûna ku hemû biryar di navendekê de werin girtin, li gund û bajaran jî were girtin û bi vê yekê gund û bajar jî bibin xwedî mafê xwe birêvebirina azad.
Zelalkirina fikarên siyasî
Rêberê Gelê Kurd Abdullah Ocalan bersiveke zelal dide fikarên “parçebûnê” yên ku di siyasetê de tên nîqaşkirin, bi zimanekî eşkere diyar dike ku ev model nabe sedema cudabûnê û wiha dibêje: “Ez behsa dewletek an herêmeke cuda nakim.” Bi vê gotinê, Ocalan radigihîne ku daxwaza demokrasiya herêmî, projeya demokratîzekirina tevahiya Tirkiyeyê ye. Li gorî vê perspektîfê, xweseriya herêmî, yekparebûna welat lawaz nake, berevajî wê bi “ruheke demokratîk” hîn kûrtir û xurttir dike.
