Rêberê Gelê Kurd Abdullah Ocalan peyamek ji Konferansa Meclîsa Îştarê ya 14emîn a Wargeha Penaberan a Mexmûrê re şand û got: “Pêvajoya Civaka Aştî û Demokrasiyê bi serkeftî encam bibe wê rêya vegera gelê Mexmûrê ya li ser xaka wan jî vebe.”
Rêberê Gelê Kurd Abdullah Ocalan peyamek ji bo Konferansa Meclîsa Îştarê ya 14emîn a Wargeha Penaberan a Mexmûrê re şand û konferans silav kir.
Peyama Rêberê Gelê Kurd Abdullah Ocalan wiha ye:
“Ez bi hêvî me ku konferansa Meclîsa Jinan ya Mexmurê ku dê pêk bînin, wê têkoşîna jinan ya azadî û wekheviyê bilind bikin, erk û berpirsyariyên xwe yên di avakirina Civaka Aştî û Demokrasiyê de bi cih bînin.
Bêyî azadiya jinan sosyalîstbûyîn nabe
Demek nû dest pê dike. Pergaleke demokratîk û komînal wê di pêşengiya jinan de pêş bikeve. Pêvajoya demokratîk, komînalîst şêweyê civaka jin-dayîkê yê nûjenbûyî ye. Xwegihandina rastiya civakî jî encex bi vê rêbazê dikare pêkan be. Heya ku desthilatdariya zilam neyê derbaskirin, di qadên felsefe, zanîst, etîk, estetîk û ol de heqîqeta civakî dernakeve holê. Heya çanda zilamê desthilatdar ya di kurahiya civaka dema nû de veşartî neyê hilweşandin, weke Marksîzmê jî daye îspatkirin serxistina sosyalîzmê jî ne gengaz e. Xwegihandina sosyalîzmê di azadiya jinê re derbas dibe. Bêyî azadiya jinan sosyalîstbûyîn nabe. Sosyalîzm nabe. Di vê wateyê de bingehên xebatên siyasî, aborî, çandî yên Meclisa me ya jinên Mexmûrê pêwîst e li ser vê yekê pêk bê.
Gelê me yê Mexmûrê ku bi zorê ji cih û warên xwe bûne, tevî hemû zoriyan, çewisandin û zilmê dest ji nasnameya xwe, çanda xwe bernedan, di nava çolê de jiyanek avakirin û biserxistin. Bi vî awayî bûne parçeyek ji têkoşîna azadiyê ku cihê wan yê di têkoşîna me de bênîqaşe.
Ji bo vegera welat pêwîst e zemîne hiqûqî û civakî were avakirin
Naskirina gelê Kurd ya di nava hiqûqê de, vebûna qenalên siyaseta demokratîk, xistina bin ewlehiyê ya maf û azadiyê ji aliyê çareseriya mayînde ve girîng e. Vegera gelê Mexmurê jî di van mercan de wê bi wate be. Ji bo vegera li welat pêk were, pêwîst e zemînê siyasî, hiqûqî û civakî were avakirin. Ne kes an malbat, divê di çarçoveya siyasî û hîquqî de vegera kolektîf bê nîqaşkirin. Gelê Mexmûrê ku mexdûrê şer û pevçûnan e di heman demê de kirdeya Civaka Aştî û Demokrasiyê ne jî. Ez bawer im ku pêvajoya Civaka Aştî û Demokrasiyê bi serkeftî encam bibe wê rêya vegera wan ya li ser xaka wan jî vebe. Di vê çarçoveyê de gelê me û konferansa we silav dikim.
Bi Silav û Hezkirinên xwe yên bêdawî.
Abdullah Ocalan
15.10.2025”
