Li Wargeha Penaberan a Şehîd Rûstem Cûdî (Mexmûr) di 27emîn salvegera Komploya Navbetewî ya ku li dijî Rêberê Gelê Kurd Abdullah Ocalan pêk hatî, bi meşeke girseyî hate şermezarkirin.
Li Wargeha Penaberan a Şehîd Rûstem Cûdî (Mexmûr) bi hezaran kes li pêş Saziya Malbatên Şehîdan kom bûn û dest bi meşê kirin. Gel di meşê de bênavber dirûşmeya, “Kes Nikare Roja Me Tarî Bike”, “Bê Serok Jiyan Nabe”, “Bijî Serok Abdullah Ocalan” berz kir. Gelê wargehê bi alên KCKê, wêneyên Rêberê Gelê Kurd Abdullah Ocalan meşa xwe heta ber avahiya Neteweyên Yekbûyî domand.
Li ber avahiya Neteweyên Yekbûyî bi boneya rojê Hevseroka Meclîsa Gel a Mexmûrê Fîlîz Budak axivî. Fîlîz Budak di axaftina xwe de şehîdên şoreşê bibîr anî û wiha axivî: “Di kesayeta Şehîdên Hûn Nikarin Roja Me Tarî Bikin de em hemû şehîdên Şoreşa Kurdistanê bibîr tînin û soza domandina têkoşîna wan didin. 27 sal berî niha seranserê welat bi dehan ciwanên Kurd bedena xwe li dora Rêberê Gelê Kurd Ocalan kirin xeleka ji agir. Li kolanên Ewrûpa û hemû Kurdistanê ciwanan qîr dikirin û digotin Bê Serok Jiyan Nabe û Li Welatê Me Yek Roj Heye. Ciwanên Kurd di bin vê dirûşmeyê de canê xwe feda kirin û komploya navnetewî vala derxistin. Em saya wan gihîştin vê rojê. Di encama têkoşîna gelê Kurd de gelê Kurd, jin û ciwan serketin. Em ji bo xwe gihandina vê rojê mînetdarî wan ciwanan in.”
‘Komplo têk çû’
Budak bal kişand ser armanca Komploya Navnetewî jî û axaftina xwe de wiha domand: “Hêzên komploger li ser têkbirina Têkoşîna Azadiya gelê Kurd li hev kirin û di sala 1998an de vê komployê dan destpê kirin. Rêberêberê Gelê Kurd û gelê Kurd li pêşiya ji nû ve dizanynkirina Rojhilata Navîn wek astengkek didîtin û ji ber vê li dijî Rêbertiya me vê komployê pêk anîn. Ev berdewamê Lozan û Sykes Pîcotê ye. Bi van kiryarên xwe û ji ber ku her carê Rêberên Kurdan bi sêdarê kirine encam, wisa fikirîn ku wê bi dîlgirtina Rêberê Gelê Kurd jî têkoşîna gelê Kurd bidawî bikin. Lê ya ku nedîtîn bû, ji 7 heta 70 salî hemû gelê Kurd wek Rêberê xwe didît û xwedî derdiket. Di encama vê têkoşînê de komplo vale derket. Rêberê Gelê Kurd Ocalan tenê bi awayek fîzîkî dîl girtî ma, lê bi awayek felsefîk û fikrî azade. Lewra jî ev komplo vala derket.”
Fîlîz Budak di axaftina xwe de bal kişand ser têkoşîna Rêberê Gelê Kurd Ocalan û êrişên li ser Rojavayê Kurdistanê jî û wiha got: “Rêberê me ligel êrişan tu carî ji têkoşîna xwe tawîz neda. Got di sosyalîzmê de israr di mirovbûnê de israr e. Em bi Rêberê Gelê Kurd û paradigmaya wî de mirovbûnê de israr dikin. Em netew-dewletê datînin aliyekî û pirrengiya civakê esas digirin. Îro komploya navnetewî bi êrişên li ser Rojavayê Kurdistanê didome. Bi van êrişan re êrişî fikir û felsefeya Rêberê Gelê Kurd kirin. Di encama têkoşîna 27 salan a Rêberê Gelê Kurd Ocalan de derket holê ku kes nikare gelê Kurd di şer de têk bibe. Hêzên navnetewî xwestin bi êrişên Rojava re têkoşîn û destketiyên gelê Kurd ji holê rakin. Lê gelê Kurd bi yekitiya netewî bersiva êrişan dan û dubare komplo vala derxistin.”
Fîlîz Budak bang li gelê Kurd kir ku yekitiya neteweyî pêk bînin û wiha dawî li axaftina xwe anî; “Sedsala 21emîn wê bibe sedsala serkeftina gelê Kurd. Lewre gelê Kurd ber bi kongreya netewî ve diçe.”
Daxuyanî bi dirûşmeyên, “Kesek Nikare Roja Me Tarî Bike” û “Bê Serok Jiyan Nabe” bi dawî bû.
