Xizmên Windayan û Şaxa ÎHDa Êlihê di hefteya 721emîn de li aqûbeta Serdar Taniş û Ebubekir Denizê ku di 25ê Çileya 2001î de li navçeya Silopiya ya Şirnexê hatibûn binçavkirin û ji wê demê heta niha tu agahî ji wan nehatiye girtin pirsîn.
Xizmên Windayan û Şaxa Komeleya Mafên Mirovan (ÎHD) a Êlihê bi dirûşma “Bila winda bên dîtin û faîl bên darizandin” di 721emîn çalakiya xwe li pêşiya Bîrdariya Mafên Mirovan a Kolana Gulistanê li dar xist. Xizmên Windayan, rêveberên ÎHDê, parastvanên mafên mirovan û gelek kes tev li çalakiyê bûn. Di çalakiyê de wêneyên windayan hatin hilgirtin.
Xizmên Windayan di çalakiya xwe ya îro de aqûbeta Serdar Taniş û Ebubekir Deniz ên di 25ê Çileya 2001î de li navçeya Silopyayê hatibûn binçavkirin û windakirin pirsîn. Metna daxuyaniyê rêveberê ÎHDê Zana Yucel Bozkurt xwend.
‘Armanc astengkirina xebatên siyasî bû’
Zana Yucel Bozkurt diyar kir ku Serdar Taniş û Ebubekir Denizê ku di 25ê Çileya 2001î de li navçeya Silopiya ya Şirnexê hatibûn binçavkirin û ji wê demê heta niha tu agahî ji wan nayên girtin û wiha axivî: “Di Îlona 2000î de partiyê Serdar Taniş ji bo damezrandina rêxistina HADEPê ya navçeyê li Silopiya ya Şirnexê hate peywirdarkirin. Rêxistina navçeya HADEPê di 3ê Çileya 2001î de li Silopiyayê hate vekirin û Serdar Taniş bû serokê navçeyê. Serdar Taniş, piştî ku rastî gefên giran ên Fermandarê Alaya Cendirmeyan a Şirnexê General Levent Ersoz û Fermandarê Qereqola Cendirmeyan a Navçeya Silopyayê Kaptan Suleyman Can hat. Armanca wan bidawîanîna çalakiyên partiyê bû.”
‘Tevî serlêdanan hat windakirin’
Zana Yucel diyar kir ku di 9ê Çileya 2001î de li dijî gefan ji bo ewlehiyê serlêdanên nivîskî ji Serokkomar Ahmet Necdet Sezer, Wezareta Dadê, Wezareta Karên Hundir û hemû rayedarên fermî re hatin kirin. Her wiha mafê wan ê lidarxistina çalakiyên siyasî dihatin astengkirin. Di 25ê Çileya 2001î de saet 13:30an de sê kesên ku wesayîteke ku Fiat a şîn diajotin, ji Serdar Taniş xwestin ku siwarî wesayîtê bibe. Serdar Taniş ev daxwaza siwarbûna wesayîtê red kir. Sê kesên di wesayîtê de jê re ku gotibûn ew ê wî bibin Fermandariya Cendirmeyan. Ew jî ji wan re gotibû ji bo daxwaznameyeke fermî bixwaze dê bi xwe biçe.”
Çalakî bi deqeyekî rûniştandinê bi dawî bû.
